Teo e Fundación ONCE alíanse para impulsar o emprego das persoas con discapacidade

O convenio reforzará a coordinación entre os servizos municipais e os equipos técnicos da ONCE para facilitar unha atención prioritaria e o acceso a un emprego de calidade

A alcaldesa de Teo, Lucía Calvo de la Uz, e a directora de Marketing Social e Convenios de Fundación ONCE e directora da Área de Empresas, Alianzas e RSC-D de Inserta Empleo, Mar Medeiros, asinaron un convenio Municip para promover a inclusión laboral das persoas con discapacidade no municipio.

O acordo establece un marco de colaboración para desenvolver accións de formación, captación, derivación, orientación e inserción laboral. Entre os seus principais obxectivos figura a creación dunha canle de comunicación fluída entre os servizos sociais e de emprego do Concello e os equipos técnicos da ONCE, que permita detectar as persoas que precisen apoio e atendelas de maneira prioritaria.

A alcaldesa destacou que esta colaboración contribuirá a mellorar a inserción laboral, avanzar na accesibilidade universal e deseñar conxuntamente políticas sociais inclusivas. Así mesmo, vinculou o convenio co compromiso de Teo coa Axenda 2030 e cos Obxectivos de Desenvolvemento Sostible, a cohesión social e a atención aos colectivos en situación de vulnerabilidade.

Pola súa parte, Mar Medeiros salientou a importancia das alianzas entre as administracións públicas e as entidades especializadas para construír contornas máis inclusivas. “Con este convenio impulsaremos non só a incorporación das persoas con discapacidade ao mercado laboral, senón tamén iniciativas que favorezan a accesibilidade universal e a participación plena de todas as persoas na vida económica e social de Teo”, afirmou.

O convenio, cofinanciado pola Unión Europea, tamén prevé accións de sensibilización dirixidas á cidadanía, aos axentes sociais, ás organizacións e ás institucións para dar a coñecer as capacidades das persoas con discapacidade e favorecer a súa incorporación ao mercado laboral. No ámbito empresarial, promoverase a aposta polo talento mozo.

A colaboración estenderase ao tecido asociativo de Teo, a través do cal se canalizará a prestación de servizos ás persoas con discapacidade. Ademais, desenvolveranse accións de difusión para achegar á sociedade as iniciativas impulsadas ao abeiro deste acordo.