A venda anticipada para a Feira da Sidra chega xa ao 50%

• Mañá será o último día para facerse co vaso evitando as colas que sempre se forman para adquirilos na propia feira.

A Estrada, 4 de xuño de 2026.- A Praza da Constitución prepárase xa dende primeira hora desta mañá para acoller a XIII Feira da Sidra. A montaxe da barra e do espazo que ocuparán os 24 lagares participantes está xa en marcha, nunha xornada na que a venda
anticipada de vasos para a degustación continuou no Novo Mercado, despois de que a organización decidira atender a petición de ampliala. A última hora desta mañá trasladouse que xa se chegou ao obxectivo marcado de vender de maneira anticipada o 50% dos vasos dispoñibles para catar os caldos presentes no evento.

Aínda que inicialmente estaba previsto pechar a venda este mércores, o elevado número de reservas que se efectuaron por teléfono e a través das redes sociais para a recollida dos vasos (no espazo habilitado ao efecto no mercado municipal) animou aos organizadores a atender a solicitude de ampliar a venda a hoxe e mañá.

Deste xeito, aqueles que non compraran xa o vaso e queiran evitarse as colas o sábado para a súa adquisición, teñen aínda a oportunidade de mercalo mañá pola mañá, no horario de funcionamento da Praza de Abastos.

A venda anticipada veu funcionando ben para a Feira da Sidra nos últimos anos. En 2024 vendeuse deste xeito o 30% dos vasos, mentres que en 2025 xa se comercializaron por adiantado a metade dos dispoñibles. É por iso que nesta edición se agarda superar esta porcentaxe, axilizando o discorrer da degustación en beneficio de todos. Co vaso xa na man, os participantes poderán pasar directamente a saborear as sidras presentes.

Cómpre lembrar que este ano son 4.000 os vasos que se puxeron á venda. Neles escanciaranse o sábado 5.000 litros de sidra, 1.000 máis que o ano pasado. O prezo dos vasos situarase en 9 euros e dará opción a catar as sidras tantas veces como se desexe.

A montaxe continuará ao longo da tarde e mañá. A forma da barra, que se sitúa nos 80 metros, xa comezaba a percibirse esta mañá. A distribución dos lagares farase o sábado tentando favorecer a rotación do público.