ASANOG anima a participar na Andaina Solidaria de Oroso a prol do seu labor coas familias de menores con cancro

• Aldara Palmeiro, responsable de comunicación da Asociación de Cancro Infantil e Xuvenil de Galicia, destaca a importancia desta iniciativa organizada polo Concello de Oroso para contribuír ao acompañamento que a entidade presta a centos de familias de toda a comunidade

A Asociación de Cancro Infantil e Xuvenil de Galicia (ASANOG) anima á cidadanía a participar este domingo 14 de xuño na Andaina Solidaria organizada polo Concello de Oroso, unha iniciativa coa que se busca recadar fondos para apoiar o labor que a entidade desenvolve xunto a menores con cancro e ás súas familias en toda Galicia.

A cita arrancará ás 10:00 horas na Praza do Concello de Sigüeiro e contará cun percorrido de cinco quilómetros aberto a persoas de todas as idades. A participación será libre e non será necesario realizar inscrición previa. Ademais da marcha, ASANOG instalará unha mesa informativa na que os asistentes poderán coñecer máis de preto o traballo da entidade e colaborar adquirindo produtos solidarios ou rifas para un sorteo que terá lugar ao remate da xornada.

Aldara Palmeiro lembrou que existen diferentes formas de apoiar o labor da asociación. Ademais de participar na andaina, a cidadanía poderá colaborar mediante a compra dos produtos solidarios que estarán á venda durante a xornada ou adquirindo rifas para o sorteo que se celebrará ao remate da marcha. Tamén será posible facerse socio de ASANOG a través dunha cota anual de 10 euros. «Por moi pouco que nos pareza, sempre estamos axudando dunha forma ou doutra. Toda axuda é benvida», sinalou. Ademais, as persoas que non poidan asistir terán a posibilidade de colaborar a través de Bizum co código 11243.

A responsable de comunicación destacou a importancia deste tipo de iniciativas para que a asociación poida continuar acompañando ás familias que afrontan un diagnóstico de cancro infantil. «É moi difícil poñerse na situación destas familias, pero só de imaxinar o que pode ser o impacto para elas recibir esta noticia e sentirse acompañadas durante todo este proceso, que é moi complexo, é importantísimo».

Palmeiro explicou que ASANOG conta cun equipo multidisciplinar que acompaña ás familias durante todo o proceso da enfermidade, ofrecendo apoio emocional, social e terapéutico adaptado ás necesidades de cada caso. A entidade traballa tanto cos menores como co seu entorno familiar para afrontar as diferentes situacións que poden xurdir desde o momento do diagnóstico. «O noso equipo está cada día acompañando ás familias desde o traballo social, a psicoloxía, a terapia ocupacional e no ocio e tempo libre».

Preto de 300 familias acompañadas en Galicia

ASANOG desenvolve a súa actividade en toda Galicia e presta atención directa nos hospitais con servizos de oncoloxía pediátrica de Santiago de Compostela, A Coruña e Vigo. «O ano pasado fixemos atención a arredor de 300 familias en toda Galicia». Así o destacou Aldara Palmeiro, quen explicou que esa cifra inclúe tanto novos diagnósticos como familias ás que a entidade segue prestando apoio ao longo do tempo. A responsable de comunicación subliñou que ese acompañamento non remata coa chegada do diagnóstico, senón que se mantén durante todas as etapas da enfermidade. «Hai diferentes fases: o debut, a fase do tratamento ou as altas; sempre estamos ao lado das familias», sinalou.

Ademais da atención directa que presta nos hospitais, ASANOG conta co programa Sumamos, no que se integran iniciativas, eventos solidarios e colaboracións que contribúen a recadar os fondos necesarios para que a entidade poida seguir desenvolvendo o seu labor de acompañamento ás familias.

O apoio de Oroso

A responsable de comunicación de ASANOG tamén agradeceu o apoio que a entidade recibe habitualmente en Oroso. «A veciñanza de Sigüeiro e de Oroso en xeral é moi colaborativa con nós e a xente responde moi ben». Palmeiro lembrou que a asociación participa ao longo do ano noutras iniciativas solidarias que se celebran no municipio, como as organizadas por Lembranzas do Tambre ou o Festival XiraTroita, e destacou que esa implicación constante da veciñanza resulta fundamental para dar visibilidade ao labor da entidade e seguir recadando fondos para apoiar ás familias.