A Comisión de Festas de San Xoán de Calo pecha tres anos á fronte da organización

A Comisión de Festas de San Xoán de Calo, no concello de Teo, anunciou o peche da súa etapa á fronte da organización das festas patronais despois de tres anos de traballo. Un período marcado, segundo destacan os seus integrantes, pola ilusión, o compromiso e a implicación dun grupo de amigos que decidiu asumir a responsabilidade de garantir a continuidade e impulsar o crecemento das celebracións.

O anuncio produciuse desde o palco durante o peche das festas deste ano e converteuse nun dos momentos máis emotivos das últimas edicións. Ao comunicar que esta sería a última festa organizada pola actual Comisión, o público respondeu cun espontáneo “¡Noooon!”, seguido dunha longa ovación que emocionou tanto aos asistentes como aos propios membros da organización.

Ao longo destes tres anos, a Comisión apostou por facer medrar as festas de San Xoán de Calo sen perder a súa esencia. O traballo desenvolvido e o respaldo dos veciños permitiron consolidar a celebración e reforzar a súa presenza no calendario festivo da comarca.

Na súa despedida, os integrantes da Comisión trasladaron o seu agradecemento aos compañeiros, colaboradores, veciños e familias que participaron de maneira desinteresada no proxecto. Tamén recoñeceron o respaldo das numerosas empresas que colaboraron cada ano a través do libro de publicidade, contribuíndo economicamente á organización das festas.

Entre os apoios recibidos, a Comisión destacou especialmente a implicación de Vayper Automoción pola súa colaboración constante e pola confianza depositada nas diferentes iniciativas impulsadas durante estes tres anos.

O agradecemento estendeuse igualmente ás orquestras, grupos, dúos, discomóbiles e profesionais que participaron nas distintas edicións. A Comisión realizou unha mención especial á Orquestra Olympus, a Zeus e a Pepe polo seu apoio nos momentos máis importantes desta etapa.

Tamén quixeron recoñecer publicamente a implicación de Javier Torres, representante na zona de Gaias Eventos, destacando a súa constante disposición para colaborar e prestar axuda máis alá das súas obrigas profesionais.

A actual Comisión despídese orgullosa do camiño percorrido e convencida de que o éxito destes tres anos non se mide unicamente polo número de asistentes ou pola dimensión dos espectáculos, senón polas persoas que contribuíron a que as festas continuasen medrando.

“Marchamos coa tranquilidade de saber que o demos absolutamente todo por Calo. O tempo borrará os carteis e apagará os escenarios, pero nunca esqueceremos ás persoas que camiñaron ao noso lado. Grazas por permitirnos vivir a honra de servir ao noso pobo”, sinala a Comisión na súa mensaxe de despedida.