Evacuado en helicóptero un motorista tras aparecer tirado nunha cuneta en Melide

O home foi localizado semiinconsciente xunto a unha motocicleta na estrada DP-4601, á altura de Gondollín

Un home tivo que ser evacuado este luns en helicóptero medicalizado tras ser localizado tirado nunha cuneta na estrada DP-4601, ao seu paso por Gondollín, no concello de Melide.

Segundo a información facilitada polo 112 Galicia, o aviso produciuse arredor das 15:30 horas. As persoas que alertaron aos servizos de emerxencias atoparon o home tendido na cuneta e cunha motocicleta ao seu carón, polo que inicialmente se considerou que podería ter sufrido unha caída co vehículo.

O motorista atopábase semiinconsciente no momento no que se solicitou asistencia. Ante o seu estado, os profesionais de Urxencias Sanitarias de Galicia-061 mobilizaron ata o lugar unha dotación a bordo do helicóptero medicalizado con base en Santiago de Compostela.

Finalmente, o home foi evacuado por vía aérea para recibir atención sanitaria. No momento do seu traslado xa recuperara a consciencia.