A parroquia de Cornado (Touro) estrea novembro coa V Festa dos Rixóns en Pota de Ferro

A V edición desta festa celebrarase no concello de Touro cunha ampla programación cultural e gastronómica, que inclúe unha andaina, música en directo, un concurso de disfraces e a tradicional degustación de rixóns. As organizadoras destacan o valor desta festa como encontro comunitario.

O Campo da Festa de San Tirso de Cornado, en Touro, acollerá o próximo 1 de novembro a V edición da Festa dos Rixóns en Pota de Ferro, un evento organizado pola Asociación O Batán que busca manter viva a tradición galega a través dunha xornada que combina gastronomía, música e actividades para todos os públicos.

Nunha entrevista recente en Radio Líder Santiago, dúas integrantes da comisión organizadora destacaron o papel desta festa como espazo de encontro para a comunidade e como símbolo do compromiso coas tradicións galegas. «Queremos que a xente de Touro e de arredores poida reunirse, desfrutar da nosa cultura e dos nosos pratos típicos. É unha oportunidade de poñer en valor o noso patrimonio inmaterial e, ao mesmo tempo, pasalo ben», explicaron.

Programación Completa da Festa dos Rixóns

A festa dará comezo ás 10:00 da mañá cunha andaina de aproximadamente 10 km que partirá desde o campo da festa. Esta «Andaina da Festa dos Rixóns» ofrece un percorrido de dificultade media para os amantes da natureza e do sendeirismo. As inscricións están abertas ata o 31 de outubro, e poden realizarse enviando un correo a info@alecrinactividades.com ou chamando ao 677 525 930.

Ás 13:15, Carmencita de Adolfo dará inicio ao acto oficial co seu pregón-faladoiro, seguido da sesión vermú ás 13:30 coa actuación musical de OCT Ultreia. O xantar será unha das grandes atraccións gastronómicas da xornada, cunha oferta que inclúe rixóns, filloas, tortillas e pizzas de rixóns, dispoñibles para todos os asistentes.

A partir das 16:00, os máis pequenos poderán desfrutar do espectáculo de Mago Paco, mentres que ás 17:00 terá lugar un concurso de disfraces, animando a participación e a creatividade dos asistentes.

A música tradicional volverá encher o campo da festa coa actuación de Requinta de Lampai ás 17:30 e Silva Redonda ás 18:30. A xornada rematará cunha foliada libre onde se convida a todos os asistentes a participar e celebrar a cultura galega a través da música e do baile.

Segundo explicaron Maribel e Lola, dúas das organizadoras na entrevista en Radio Líder Santiago, esta quinta edición da Festa dos Rixóns en Pota de Ferro representa unha oportunidade de «coñecemento, diversión e cultura compartida». Con máis actividades, espazos de lecer e unha aposta clara pola tradición culinaria e musical, agardan que a festa continúe crecendo en participación e en impacto.

Tes a entrevista completa no seguinte enlace.