Aitor Bouza califica o pleno das VUT como «un paripé» e afirma que «o tempo darame a razón»

O Partido Socialista de Santiago de Compostela atópase en plena crise tras a votación no pleno municipal sobre a ordenanza para regular as vivendas de uso turístico (VUT). Os seis concelleiros socialistas romperon a disciplina de voto establecida pola executiva local liderada por Aitor Bouza, e votaron a favor da ordenanza presentada polo goberno bipartito, en lugar de absterse como se lles ordenara.

Aitor Bouza, secretario xeral dos socialistas composteláns, declarou hoxe en Radio Líder Santiago que «o tempo darame a razón» e cualificou o pleno de onte como «un paripé». Bouza subliñou que o aprobado no pleno só era «o formulario para as comunicacións previas» e cuestionou a eficacia da nova normativa preguntando á alcaldesa: «¿Cantos pisos se ilegalizaron dende onte?».

Bouza destacou que a decisión do futuro dos edís rebeldes depende do PSdeG-PSOE Provincial da Coruña e asegurou que «ninguén está por riba do partido nin dos seus Estatutos». Afirmou tamén contar co respaldo do partido e indicou que acatará calquera decisión que se tome respecto aos concelleiros disidentes.

O secretario xeral recordou que en Santiago xa estaban prohibidas as vivendas de uso turístico no casco vello e limitadas na cidade desde 2023, grazas á modificación do PXOM realizada polo PSdeG. Segundo Bouza, a nova ordenanza non altera estas restricións e considera que o goberno local utilizou a cuestión para distraer a atención das súas propias promesas incumpridas.

A executiva local socialista trasladará á dirección provincial a falta de cumprimento das normas do partido por parte dos concelleiros, solicitando que se adopten as medidas disciplinarias oportunas segundo os Estatutos do PSOE. Bouza defendeu que a súa proposta de abstención se baseaba en que a ordenanza sometida a votación non afectaba o fondo da cuestión e que se precisaba un acordo máis amplo e significativo para abordar a problemática das vivendas baleiras e a declaración de Santiago como «zona tensionada» para limitar os prezos dos alugueiros.

A entrevista completa no seguinte enlace.