Bronce europeo para Luis Penido tras unha tempada de superación

• O equipo galego e o seu piloto, Luis Penido, conquistan a terceira posición final do Grupo 5 do FIA European Hillclimb Championship 2026 tras unha campaña marcada polas adversidades e a capacidade de sobrepoñerse a cada obstáculo

Buzet (Croacia), 20 de setembro de 2026. O Luis Penido Rally Team puxo esta fin de semana o broche de “bronce” a unha das tempadas máis exixentes e emocionantes da súa traxectoria deportiva. A histórica subida de Buzetski Dani, en Croacia, escenario da última proba do FIA European Hillclimb Championship 2026, foi o lugar onde o equipo galego culminou unha auténtica xesta deportiva ao asegurar a terceira posición final do Grupo 5 do Campionato de Europa, só superados polo checo Bejda e o polaco Mikolajczyk, situando o equipo compostelán no podio continental e converténdoo unha vez máis no gran representante de Galicia e España na máxima competición europea de montaña.

Máis alá dos números e dos resultados, o podio acadado en Croacia simboliza a recompensa a meses de traballo, sacrificio e perseveranza. A tempada estivo lonxe de ser un camiño sinxelo. Os problemas de suspensión sufridos no seu coche, que incluso provocaron un importante accidente en Alemaña, puxeron a proba a fortaleza do proxecto. Nese momento, o campionato parecía complicarse enormemente, pero lonxe de renderse, piloto e equipo decidiron afrontar o desafío con máis determinación ca nunca.

A partir de aí comezou unha carreira paralela, a que non aparece nas clasificacións oficiais. Proba tras proba, o Luis Penido Rally Team foi pelexando cada punto do campionato e demostrando que a verdadeira grandeza dun equipo non se mide cando todo funciona perfectamente, senón cando é capaz de levantarse despois de cada golpe.

A recompensa chegou finalmente en Buzet. Nunha das citas máis emblemáticas e exixentes do calendario continental, Luis Penido e todo o seu equipo certificaron un resultado que transcende o meramente deportivo. O terceiro posto final do Grupo 5 supón o recoñecemento ao traballo dunha estrutura que percorreu miles de quilómetros levando o nome de Galicia e España por algúns dos escenarios máis prestixiosos do automobilismo europeo.

En palabras do piloto compostelán: “Esto é unha marabilla. Ao final terminamos terceiros do Grupo 5, despois de 10 carreiras, nunha tempada na que tivemos varias incidencias, pero estamos moi contentos. Grazas aos patrocinadores e colaboradores do equipo, grazas a todo o mundo que nos apoia desde sempre, a todos os que nos están sempre botando unha man e que fan posible que poidamos facer estas cousas tan lonxe da nosa terriña”.

Porque algunhas tempadas lémbranse polas vitorias. Outras, pola maneira en que se conseguen. E a de 2026 quedará na memoria como unha desas historias que explican por que o automobilismo é moito máis ca unha competición.