Falece unha muller tras ser atropelada por un camión na Estrada

Unha muller faleceu este xoves tras ser atropelada por un camión que transportaba produtos de alimentación na Avenida Benito Vigo, no municipio da Estrada, á altura das oficinas de Facenda.

O suceso produciuse arredor das 11.00 horas, cando o 112 Galicia recibiu varios avisos alertando do atropelo. Segundo a información facilitada polo servizo de emerxencias, a vítima quedou atrapada debaixo do vehículo.

Ata o lugar desprazáronse efectivos de Urxencias Sanitarias de Galicia-061, que xa foran mobilizados tras ter coñecemento do accidente. Tamén interviñeron axentes da Policía Local, membros do GES da Estrada e efectivos dos Bombeiros do Deza, activados para colaborar nas tarefas de rescate e asistencia.

Malia a rápida intervención dos servizos de emerxencias, pouco despois confirmouse o falecemento da muller no propio lugar do sinistro. As circunstancias nas que se produciu o atropelo están a ser investigadas.