O Concello realiza unha recepción ao talento amesá nos XXX Premios de Teatro María Casares

• O alcalde e  concelleiro de Cultura, Blas García, destaca “a calidade artística que ten Ames, xa que conta entre a súa veciñanza con músicos, actores e actrices que destacan no panorama galego e nacional, tanto na escena musical como das artes escénicas”
• “Teño que felicitar a todos os artistas que conseguiron un premio na gala dos XXX Premios de Teatro María Casares, pero tamén a aqueles que obtiveron nomeamentos”. Ademais, mostrou unha vez máis “o compromiso do Concello de Ames coas artes escénicas e co teatro”
• En dito acto púxose de manifesto a necesidade de contar cun novo auditorio acorde ao tamaño e o crecemento que Ames experimentou nos últimos anos

Ames, 23 de abril de 2026.- O alcalde e concelleiro de Cultura, Blas García,xunto a outros/as concelleiros e concelleiras do grupo de goberno e dos grupos municipais do Partido Popular e do BNG, realizáronlle este pasado mércores pola tarde unha recepción institucional aos actores, actrices e persoal das compañías que foron premiados/as e nominados/as nos XXX Premios de Teatro María Casares. A través de dito recibimento, realizado no salón de plenos da Casa do Concello, púxose en valor o talento e calidade artística amesá no eido cultural. En dito acto púxose de manifesto a necesidade de contar cun novo auditorio acorde ao tamaño e o crecemento que Ames experimentou nos últimos anos.

O alcalde e  concelleiro de Cultura, Blas García, destaca “a calidade artística que ten Ames, xa que conta entre a súa veciñanza con músicos, actores e actrices que destacan no panorama galego e nacional, tanto na escena musical como das artes escénicas. Teño que felicitar a todos os artistas que conseguiron un premio na gala dos XXX Premios de Teatro María Casares, pero tamén a aqueles que obtiveron nomeamentos”. Ademais, mostrou unha vez máis “o compromiso do Concello de Ames coas artes escénicas e co teatro”.

A dito acto tamén asistiron concelleiros e concelleiras do goberno municipal, así como as voceiras do Partido Popular, Oliva Agra, e do BNG, Escarlata Pampín, e mailo voceiro do PSdeG-PSOE, Víctor Fernández. Todos eles/as mostráronse agradecidos por levar o nome e Ames polo país adiante.

Residencias artísticas

Por parte dos actores, actrices e persoal das compañías solicitaron máis espazos para poder ensaiar e preparar os seus espectáculos. En dito acto tamén se puxo de manifesto a necesidade de contar cun novo auditorio acorde ao tamaño e o crecemento que Ames experimentou nos últimos anos. Cómpre lembrar neste senso que o Concello de Ames dispón dun programa de residencias artísticas para creadores, creadoras e compañías profesionais que desenvolvan as súas liñas de traballo nos ámbitos das artes escénicas.

A finalidade última deste proxecto é apoiar a creación artística do tecido profesional e empresarial, facilitando espazos e equipamento para o ensaio e produción de proxectos escénicos. A cambio, as compañías deben propoñer actividades pedagóxicas orientadas á comunidade educativa, de promoción do teatro, orientadas á creación de novo público e á estrea das novas producións.

Premiados/as e nominados/as nos XXX Premios de Teatro María Casares

O Concello de Ames contou cunha numerosa representación de actores, actrices e persoal de compañía nos XXX Premios de teatro María Casares, unha mostra do gran talento artístico que hai en Ames. En representación das artes escénicas amesás, Marta Alonso Tejada acadou o premio á mellor dirección de movemento por A serie Clopen, do Centro Dramático Galego.

O músico amesán, Alonso Caxade, obtivo o premio ao mellor espazo sonoro polo traballo na obra Reconversión, de Ibuprofeno Teatro. Rafa Martínez, Miguel Gendre e Laura Pouso alzáronse co premio ao mellor espazo escénico polo seu traballo en TROMSØ, de Morraoconto.

Pola súa parte, a actriz e activista Luma Gómez foi recoñecida co premio de honra Marisa Soto en homenaxe á súa longa traxectoria no mundo da interpretación.

Carlos Labraña, autor da obra A Biblioteca Galáctica contra a IA Fantástica, producida por Tanxarina Títeres. Dita obra foi galardoada como mellor espectáculo de monicreques, destacando por defender a imaxinación fronte á intelixencia artificial. Esta obra de aventuras, música e humor celebra a amizade e a literatura, conmemorando o 75 aniversario da Editorial Galaxia.

Ademais, Pablo Reboleiro estivo nominado nas categorías de Espectáculo, Dirección e Texto orixinal, polo espectáculo A serie Clopen, do Centro Dramático Galego. Josito Porto tamén estivo nominado na categoría de mellor actor secundario polo seu papel en Mofa&Befa: Os dous de sempre, de Producións Teatrais Excéntricas.

Todos os/as premiados/as e nominados/as acudiron a dito acto excepto Alonso Caxade e Rafa Martínez, que non puideron acudir por cuestións persoais.