O PP pregunta á alcaldesa se consentirá que unha protesta do BNG interfira na Carreira Pedestre

• Constenla traslada a súa solidariedade aos policías nacionais feridos e aos veciños afectados polos disturbios e advirte de que «a violencia non pode ter coartadas ideolóxicas nin a liberdade pode ser selectiva»
• Pregunta á alcaldesa se pedirá ao BNG que non interfira na celebración da Carreira Pedestre do domingo cunha concentración na praza do Toural

O concelleiro do Partido Popular de Santiago José Antonio Constenla trasladou a solidariedade dos populares cos axentes da Policía Nacional feridos nos disturbios rexistrados na Coruña e con todos os veciños que sufriron as consecuencias dunha xornada de violencia que cualificou de «absolutamente inxustificable».

Constenla advertiu de que o sucedido deixa unha cuestión especialmente grave que non se pode pasar por alto: «En democracia non se pode pretender silenciar ao adversario pola forza. O dereito a manifestarse en contra das ideas doutro é tan lexítimo como o dereito dese outro a expresalas pacificamente».

Neste sentido, subliñou que «cando alguén pretende decidir pola forza quen pode falar e quen debe calar, non está defendendo a democracia, senón atacando unha das súas regras esenciais: o respecto ao pluralismo político».

O concelleiro popular cuestionou a posición do BNG ante os disturbios e lamentou que o partido da alcaldesa de Santiago, Goretti Sanmartín, «decidise poñerse de perfil á hora de condenar sen paliativos a violencia e preferise poñer o acento, unha vez máis, na actuación policial».

Por este motivo, Constenla dirixiuse directamente á rexedora para formularlle dúas preguntas: «Condena de maneira expresa e sen reservas os ataques contra os axentes e os actos vandálicos? E, sobre todo, aplicaría exactamente o mesmo criterio se os autores dos disturbios pertencesen a unha ideoloxía contraria á súa e os atacados fosen outros?».

Constenla insistiu en que a democracia esixe protexer o dereito á manifestación pacífica, garantir a seguridade de todos e condenar sen ambigüidades calquera agresión. «As ideas deféndense con argumentos, con liberdade e con votos, non con pedras, lume nin intimidación», afirmou.

Así mesmo, sinalou que os cidadáns merecen respecto e respostas e recalcou que «a violencia non pode ter coartadas ideolóxicas, a liberdade non pode ser selectiva e as responsabilidades políticas e institucionais non poden eludirse».

A Carreira Pedestre do domingo

Por outra banda, José Antonio Constenla tamén preguntou á alcaldesa se vai pedir á súa organización política, o BNG, que non boicotee a celebración da Carreira Pedestre prevista para este domingo, que definiu como «o evento deportivo afeccionado máis importante da nosa cidade».

O concelleiro popular referiuse á concentración prevista na praza do Toural, coincidindo co momento no que os corredores atravesarán ese punto do percorrido, e reclamou á rexedora que aclare se vai actuar para evitar que a protesta interfira no desenvolvemento da proba.

«Gustaríame preguntarlle á señora Sanmartín se vai pedir á súa organización, o BNG, que non boicotee a Carreira Pedestre cunha concentración na praza do Toural xusto á hora á que pasan por alí os corredores», manifestou.

Finalmente, Constenla lanzou unha mensaxe directa á alcaldesa: «Señora Sanmartín, é o momento de que quite a careta e decida se está cos violentos e cos que boicotean ou cos veciños. Non se pode estar con todos».

O concelleiro popular concluíu reclamando unha condena clara da violencia, o respecto á liberdade de expresión e de manifestación pacífica e a garantía de que os veciños poidan participar con normalidade nunha das citas deportivas máis importantes de Santiago.