Os mineiros de Touro-O Pino piden axilizar os trámites tras o recoñecemento europeo do proxecto

A entidade considera que a designación como Proxecto Estratéxico da Unión Europea reforza unha oportunidade histórica de emprego, investimento e futuro para a comarca.

Touro, 9 de outubro de 2026.— A Asociación de Mineiros Touro-O Pino expresa a súa enorme satisfacción pola designación do Proxecto Cobre San Rafael como Proxecto Estratéxico da Unión Europea. Este recoñecemento súmase á súa declaración como Proxecto Industrial Estratéxico (PIE) por parte da Xunta de Galicia e supón un novo respaldo á súa relevancia para a comarca e para o conxunto de Galicia.

A decisión da Comisión Europea vén confirmar o que a nosa asociación leva anos defendendo: que este proxecto representa unha oportunidade histórica para Touro, O Pino e toda Galicia. Que Europa recoñeza o carácter estratéxico do cobre de Touro para a autonomía industrial do continente é un motivo de orgullo para a comarca e un importante aval ao proxecto.

Unha oportunidade que Galicia debe aproveitar

A selección do proxecto pola Comisión Europea entre 102 solicitudes de toda Europa, xunto coa declaración da Xunta, reforza a súa importancia estratéxica. Ademais, o proxecto conta cun plan social, unha das principais reclamacións da nosa asociación, destinado a beneficiar directamente a poboación da comarca.

Por todo iso, animamos ás administracións competentes a axilizar os trámites pendentes, co rigor e as garantías necesarias, para que o proxecto poida facerse realidade canto antes.

Nun contexto no que Europa impulsa proxectos mineiros estratéxicos para garantir a súa autonomía industrial, Galicia ten a oportunidade de situarse á vangarda deste esforzo. Confiamos en que as administracións estean á altura e actúen coa dilixencia que merece un recoñecemento desta magnitude.

Un respaldo que tamén nace da comarca

O apoio ao proxecto vai máis alá das institucións. Miles de persoas participaron na festa mineira en defensa dunha minería responsable e miles de sinaturas apoiaron as alegacións presentadas pola nosa asociación. Estas mobilizacións amosan un amplo respaldo social a un proxecto que representa emprego estable, investimento e perspectivas de futuro.

Respectamos a existencia de opinións contrarias, pero rexeitamos que se presente o rexeitamento á mina como a posición do conxunto da veciñanza. As voces de quen vive e traballa aquí, e de quen quere construír o seu futuro nesta terra, tamén deben ser escoitadas e tidas en conta.

Desde a Asociación de Mineiros Touro-O Pino reivindicamos o potencial deste proxecto para situar a nosa comarca como referente dunha minería responsable, innovadora e respectuosa co medio ambiente.

Europa deu un paso decisivo. Unha parte importante da comarca leva anos expresando o seu apoio. Agora confiamos en que as administracións acompañen este camiño e fagan posible que Cobre San Rafael contribúa ao desenvolvemento económico e á recuperación demográfica de Touro, O Pino e a súa contorna.