Pedro Blanco: «O Goberno de Pedro Sánchez cumpre con feitos e Galicia avanza»

O delegado do Goberno en Galicia, Pedro Blanco, presentou o balance da primeira metade de 2026, no que defendeu que o Executivo de Pedro Sánchez está a cumprir os compromisos adquiridos coa comunidade a través de investimentos históricos, avances sociais e un forte impulso á economía.

Blanco destacou que Galicia recibirá en 2026 un total de 10.909 millóns de euros en entregas a conta, a maior cifra da súa historia, o que representa un incremento de preto do 60 % respecto dos últimos orzamentos aprobados polo Goberno de Mariano Rajoy. Ademais, subliñou que a proposta do novo modelo de financiamento autonómico permitiría sumar 587 millóns de euros anuais adicionais para Galicia, mentres que a condonación da débeda reduciría en 4.010 millóns de euros o endebedamento da Xunta.

No ámbito económico, puxo en valor o impacto do Plan de Recuperación, que xa mobilizou máis de 4.300 millóns de euros na comunidade, beneficiando a máis de 71.000 persoas e empresas, na súa maioría pequenas e medianas empresas. Segundo afirmou, estes fondos están impulsando a modernización industrial, a transición enerxética, a innovación e a dixitalización, ademais de favorecer a implantación de proxectos estratéxicos vinculados aos PERTE e á reindustrialización de Galicia.

O delegado salientou tamén os bos datos do mercado laboral. Galicia alcanzou un máximo histórico de afiliación á Seguridade Social, con máis de 116.000 persoas incorporadas ao emprego desde 2018, mentres que a taxa de paro se reduciu ata o 7,9 %. Ademais, destacou os efectos da reforma laboral, que consolidou a contratación indefinida como fórmula habitual de emprego.

En materia social, Blanco reivindicou o reforzo do Estado do Benestar a través da revalorización das pensións conforme ao IPC, a expansión do Ingreso Mínimo Vital, o incremento do financiamento da dependencia e un investimento histórico en vivenda, superior aos 900 millóns de euros. Tamén destacou o aumento dos recursos destinados á educación, á Formación Profesional, á sanidade, á igualdade e á transformación dixital.

No capítulo de infraestruturas, lembrou o avance das actuacións no Corredor Atlántico, a modernización da rede ferroviaria, os investimentos en portos e aeroportos e o mantemento das bonificacións nas autoestradas AP-9 e AP-53.

Pedro Blanco concluíu asegurando que Galicia afronta o futuro en mellores condicións grazas ás políticas impulsadas polo Goberno de España e garantiu que o Executivo continuará acelerando proxectos, executando investimentos e ampliando dereitos durante o resto da lexislatura. «Fronte ao ruído, os feitos. Fronte á confrontación, os resultados», resumiu.