Sanmartín: «Estamos facendo o traballo en solitario, co bloqueo permanente do PP na oposición e sen axuda da Xunta»

• A rexedora compostelá repasa en Radio Líder Santiago os principais avances do mandato, defende o modelo urbano e carga contra a oposición, mentres evita confirmar a súa candidatura para 2027

A alcaldesa de Santiago de Compostela, Goretti Sanmartín, fixo balance do seu mandato nunha entrevista en Radio Líder Santiago, na que combinou reivindicación de logros coa crítica directa á oposición municipal e á Xunta de Galicia. A pouco máis dun ano das eleccións de 2027, a rexedora asegurou manter “absolutamente a mesma ilusión” que ao comezo do mandato, ao tempo que puxo o foco nos cambios estruturais impulsados polo seu goberno.

Sanmartín destacou especialmente as políticas de rehabilitación urbana, como as actuacións previstas en edificios históricos do casco vello. Neste sentido, cualificou estas intervencións como “unha honra, pero tamén unha obriga”, subliñando a importancia de devolver á cidade espazos actualmente en desuso para o seu aproveitamento social e económico.

“É unha magnífica noticia que haxa novos locais de restauración, novos comercios e que eses espazos volvan estar ao servizo da cidadanía”, sinalou, insistindo na necesidade de preservar o tecido comercial tradicional como parte da identidade compostelá.

Vivenda, mobilidade e participación cidadá

Un dos eixos centrais da entrevista foi a política de vivenda. A alcaldesa puxo como exemplo o desenvolvemento da parcela de Peleteiro, onde se prevé vivenda protexida no centro urbano. “A vivenda protexida non pode estar só na periferia, debe estar tamén no centro das cidades”, afirmou.

No ámbito da mobilidade, destacou o novo contrato de transporte público, que cualificou como “un antes e un despois”, especialmente pola mellora das conexións co rural e a implantación de servizos como o bus nocturno.

Ademais, puxo en valor os encontros directos coa veciñanza, dos que asegurou que xorden demandas “moi sensatas e realistas”, centradas principalmente en cuestións de mantemento e mellora do día a día.

Críticas ao Partido Popular e ao clima político

Un dos momentos máis contundentes da entrevista chegou ao abordar a relación coa oposición. Sanmartín acusou ao Partido Popular de manter unha estratexia de bloqueo permanente: “O Partido Popular está desde o minuto 1 en campaña electoral” e actúa con “obstrucionismo para cuestións que poderían ser feitas en defensa dos intereses da veciñanza”.

A alcaldesa foi máis alá ao afirmar que os populares “sitúanse no ‘non’ a todo”, o que ao seu xuízo implica rexeitar tamén investimentos e melloras para a cidade.

Tamén cargou contra a Xunta de Galicia, á que acusou de “discriminar Santiago”, especialmente en cuestións como o financiamento da capitalidade ou a política aeroportuaria.

Turismo e aeroporto: defensa do modelo compostelán

No eido turístico, Sanmartín rexeitou o concepto de “turismofobia” e defendeu o modelo actual, destacando os datos de tráfico aéreo: “Estamos noutra liga respecto da Coruña e Vigo”, asegurou, lembrando que Santiago supera os tres millóns de pasaxeiros anuais.

Atribuíu as dificultades actuais ás obras no aeroporto e á retirada de rutas de compañías como Ryanair, pero insistiu en que o goberno local está a traballar na diversificación de conexións internacionais.

Balance de mandato: transformación e retos pendentes

Ao facer balance, a alcaldesa enumerou medidas como a implantación da taxa turística, a regulación das vivendas de uso turístico ou os avances na planificación urbana. “Non queremos actuacións puntuais, senón unha transformación da cidade con visión de futuro”, afirmou.

Entre os retos pendentes, recoñeceu a necesidade de mellorar a axilidade administrativa e reforzar o persoal municipal, sinalando que se trata de “melloras estruturais” que requiren tempo.

Silencio sobre 2027, pero con vontade de seguir

Preguntada pola súa posible candidatura nas próximas eleccións, Sanmartín evitou confirmacións, aínda que deixou aberta a porta: “Estou aquí para o que decida a miña organización”, afirmou, insistindo en que agora o prioritario é “centrarse no traballo diario”.