Un incendio nun garaxe de Lavacolla deixa ferido grave un home duns 90 anos

Un veciño duns 90 anos foi evacuado este martes en helicóptero medicalizado ao Hospital Clínico de Santiago tras sufrir queimaduras nun incendio en Lavacolla. O lume declarouse no garaxe dunha vivenda da parroquia compostelá da Sabugueira mentres o home utilizaba unha máquina.

Emerxencias recibiu o aviso pouco antes das 13.30 horas. Varias persoas achegáronse ao inmoble con extintores e lograron rescatar o afectado. Unha muller e a súa coidadora, que tamén se atopaban na casa, saíron ilesas.

Oito bombeiros de Santiago, mobilizados en tres vehículos, dedicaron unhas dúas horas a apagar as lapas e ventilar a vivenda. Na intervención participaron tamén efectivos sanitarios e das policías Nacional e Local. Os traballos obrigaron a interromper o tráfico na N-634, que se restableceu arredor das 15.00 horas.