O 27 % dos alumnos da Escola de Emprego Xuvenil da Estrada xa atopou traballo

A concelleira de Emprego da Estrada, Lucía Seoane, participou este luns na entrega de diplomas dos tres cursos desenvolvidos no marco da Escola de Emprego Xuvenil, unha iniciativa impulsada polo Concello en colaboración con Acción Contra a Fame a través do programa Vives Aprende.

Neste segundo semestre, un total de 30 persoas completaron a súa formación nos cursos de Manipulador de alimentos, Monitor de transporte e comedor escolar e Auxiliar de comercio. Segundo os datos facilitados, oito dos participantes, o que representa o 27 %, xa conseguiron incorporarse ao mercado laboral.

Durante o acto, Seoane destacou os bos resultados desta iniciativa e felicitou aos alumnos polo seu esforzo, ao tempo que lles desexou unha pronta inserción laboral. Ademais, puxo en valor o recente recoñecemento europeo recibido polo proxecto como exemplo de boa práctica pola súa contribución á creación de oportunidades para a mocidade no medio rural.

Presentado pola Fundación Galicia Europa, o programa Vives Aprende está dirixido a mozos e mozas de entre 16 e 29 anos de zonas rurais e busca reducir a fenda entre a formación e as necesidades do mercado laboral. Os datos xerais da iniciativa recollidos na plataforma Interreg Europe indican que o 59,6 % dos participantes atopou emprego, o 78,57 % obtivo unha cualificación profesional e o 100 % actualizou o seu currículo, ademais doutros indicadores que avalan o impacto positivo do proxecto