Centos de persoas acuden á Festa da Madalena no Pino

A familia Bello, funcionista deste ano, sacou á Madalena e aos santos en procesión

Centos de persoas achegáronse este mércores, 22 de xullo, á área recreativa de Castrofeito, no concello do Pino, para participar un ano máis na tradicional Festa da Madalena, coincidindo co festivo local.

A xornada relixiosa comezou coa recepción do funcionista xunto ao cruceiro, seguida da misa solemne e da tradicional procesión na honra da santa, acompañada musicalmente pola Charanga Os Celtas.

Un dos momentos máis emotivos foi o relevo na custodia da imaxe da Madalena. A familia Bello, encargada de gardala durante o último ano, cedeu este privilexio á familia Recaredo de la Hoz e a Carlos Lemos, tamén veciños de Castrofeito, que a custodiarán ata a celebración do vindeiro ano.

Tras a sesión vermú amenizada polo grupo Alaska, os asistentes compartiron o tradicional xantar popular na carballeira e nos seus arredores, nun ambiente de convivencia e celebración.

A programación festiva continúa durante a tarde coa actuación dun DJ e rematará coa verbena, na que actuarán os grupos Ráfaga e Alaska, poñendo o broche final a unha das citas máis emblemáticas do calendario festivo do Pino.