A Nocturna Estradense reunirá este sábado a 600 participantes

A décimo terceira edición da Nocturna Estradense, tamén coñecida como Estranoite, contará mañá sábado con preto de 600 participantes nas distintas categorías. A proba deportiva, organizada polo Departamento de Deportes do Concello da Estrada, converterase ademais no acto de apertura das festas patronais de San Paio.

Un dos momentos máis destacados da xornada producirase ás 23.00 horas, coincidindo coa saída da categoría absoluta, cando se procederá ao acendido do alumeado festivo instalado na vila.

A celebración da carreira levará aparellado un importante dispositivo de seguridade e regulación do tráfico coordinado pola Policía Local. Segundo explicou o xefe do corpo, Javier García, a instalación dos valados comezará ás 16.00 horas. O valado será total entre a Porta do Sol e o entronque de Calvo Sotelo con Don Nicolás, mentres que no resto das zonas afectadas se utilizará un sistema de valado parcial combinado con cinta de sinalización.

Entre as áreas que contarán con restricións parciais figuran a rúa Gradín, a rúa Antón Losada Diéguez e varios cruces da Praza de Galicia, Serafín Pazo e Praza da Constitución. Ademais, desde as 22.30 horas e ata a finalización da proba permanecerán pechadas ao tráfico numerosas rúas do centro urbano, entre elas San Paio, Antón Losada, Caldesiña, Avenida de América, García Barros, Peregrina, Serafín Pazo, Praza da Constitución, Porta do Sol, Ulla e Calvo Sotelo, onde estará situada a liña de saída e meta fronte á Sala Abanca.

A competición arrancará ás 21.00 horas coa categoría de Pitufos e continuará de forma escalonada co resto das categorías inferiores ata as 22.00 horas. A entrega de premios destes grupos realizarase ás 22.20 horas. Pola súa banda, a carreira absoluta, na que participarán atletas xuvenís, júnior e das categorías promesa, sénior e máster, dará comezo ás 23.00 horas e constará de dúas voltas ao circuíto. Os galardóns entregaranse ás 00.15 horas.

Atraccións de feira e cambios na circulación

As festas de San Paio xa están a provocar alteracións na circulación desde o pasado mércores debido á instalación das atraccións na Praza da Feira e a súa contorna. As afeccións alcanzan tamén ás rúas Irmáns Trigo, Travesía da Cañoteira e ao aparcadoiro situado entre Feira e 25 de Xullo.

As atraccións comezarán a funcionar este sábado e permanecerán operativas ata o luns 29 de xuño. Abrirán a partir das 16.30 horas e, como medida de inclusión, a primeira hora de funcionamento de cada xornada desenvolverase sen música nin estímulos sonoros para facilitar o acceso ás persoas con hipersensibilidade sensorial.

A ocupación destes espazos obrigará tamén ao traslado do mercado semanal do mércores 24 de xuño, que se celebrará no estacionamento público situado entre as rúas Iryda e Avenida de Ponteareas, así como no tramo comprendido entre esta avenida e a Porta do Sol.

Corte puntual polo encontro de Fillos e Amigos da Estrada

Por outra banda, a Policía Local informou dun corte puntual de tráfico previsto para este sábado ao mediodía con motivo da tradicional reunión anual de confraternidade de Fillos e Amigos da Estrada.

O pasarrúas comezará ás 13.15 horas na Praza da Inmaculada e discorrerá ata a alameda municipal e a Praza da Constitución. Os participantes percorrerán as rúas Don Nicolás e Calvo Sotelo, ambas peonís, e continuarán por Justo Martínez, onde a circulación de vehículos quedará interrompida temporalmente durante o paso da comitiva.