Padrón declara dous días de loito oficial polo falecemento da concelleira Ana Belén Castro García

O Concello de Padrón lamenta profundamente o falecemento de Ana Belén Castro García, concelleira do Goberno municipal desde o ano 2023.

Como mostra de respecto, recoñecemento e homenaxe á súa figura, o Goberno local decretou dous días de loito oficial.

O alcalde, Anxo Arca, expresou o pesar de toda a Corporación municipal e destacou o firme compromiso de Ana Castro co servizo público e coa veciñanza de Padrón:

«Padrón perde unha servidora pública enormemente comprometida co noso pobo. Unha concelleira competente que dedicou os últimos anos da súa vida a traballar para mellorar a calidade de vida da nosa veciñanza, asumindo áreas de gran complexidade. Foi tamén unha persoa boa, xenerosa e sempre disposta a axudar aos demais.»

O rexedor engadiu que o Goberno municipal continuará traballando na senda de progreso iniciada durante este mandato, mantendo vivo o legado e a memoria de Ana Castro, convencidos de que ese era tamén o seu desexo.

A capela ardente está instalada no Tanatorio de Padrón. O funeral celebrarase o venres na parroquia de Bamio e, posteriormente, terá lugar a incineración na máis estrita intimidade familiar.

Respectando a vontade expresada por Ana Castro, non se admitirán flores. As persoas que desexen renderlle homenaxe poderán destinar ese importe a un donativo para a investigación contra o cancro, cumprindo así o seu desexo.

O Concello de Padrón traslada o seu máis sentido pésame á súa familia, amizades e persoas achegadas, compartindo con elas a dor por esta irreparable perda e agradecendo a dedicación, o compromiso e o servizo que Ana Belén Castro García prestou ao municipio.