Santiago aprueba la construcción de 67 vivendas en la urbanización do Muíño de Vidán

O executivo municipal aprobou este luns de forma inicial o proxecto de urbanización do solo urbano delimitado número 11 do Muíño de Vidán (SUD-11), promovido por GRUPO TABORAM S.L, un ámbito cunha superficie de 23.850,76 m2 situado ao sur da avenida da Mestra Victoria Míguez. O plan parcial, que fora aprobado definitivamente en 2014, define unha edificabilidade total de 9.492 m2 construídos: 3.322 de uso comercial e terciario e 6.170 de uso residencial, dos que 1.234 deben ser para vivenda protexida (o 20%).

Como sinalou a portavoz municipal, “en número de vivendas, o plan parcial prevé 12 vivendas unifamiliares e 55 vivendas en edificio colectivos: un total de 67 vivendas, das que 13, ese 20%, deben ser protexidas”.

O ámbito ten propietario único e o sistema de actuación é o de concerto. O proxecto de equidistribución aprobouse definitivamente en 2024 e estableceu unha unha cesión obrigatoria do 19,11% do aproveitamento dunha das parcelas resultado (a destinada a vivenda colectiva e usos terciarios), onde se localiza a reserva obrigatoria de vivenda protexida de 1.234 m2 construídos, segundo sinalou a edila.

“O proxecto de urbanización concreta agora as vías, espazos públicos, conexións de servizos, alumeado público e xardinería”, abondou Louzao, que cuantificou a participación do Concello nos gastos de urbanización nun 5,48%, cun custo provisional estimado de 75.088,81 euros dun total de 1.370.233,80.

A edificación colectiva repártese en dúas faixas paralelas á avenida da Mestra Victoria Míguez, con acceso desde esta e escalonadas para salvar o forte desnivel que existe. Detrás delas haberá vía de acceso ás 12 vivendas unifamiliares pareadas que se sitúan na parte baixa antes da zona verde. O antigo camiño peonil da Codeseira de Vidán intégrase na zona verde que bordeará o río Sarela, onde se sitúa o muiño catalogado que dá nome ao ámbito e a súa canle de captación de auga.

O proxecto aprobado someterase agora a exposición pública polo prazo dun mes logo da publicación do anuncio correspondente no Boletín Oficial da Provincial da Coruña.

Recepción das obras do Pazo de Raxoi 

Tal como xa adiantara a alcaldesa en rolda de prensa, a Xunta de Goberno autorizou hoxe o inicio dos trámites para recibir as obras de adecuación do Pazo de Raxoi para a realización de visitas turísticas de carácter histórico, arquitectónico e artístico.

A tamén concelleira de Turismo lembrou que se trata dun proxecto que conta cun financiamento de 3 millóns de euros de fondos Next Generation, concedido o 20 de outubro de 2022 no marco do Plan de recuperación, transformación e resiliencia e xestionada a través do Grupo de Cidades Patrimonio da Humanidade.

“Ao abeiro do obxectivo de que o Pazo de Raxoi sexa visitable, as obras resolveron a accesibilidade do edificio e permitiron tamén acondicionar espazos de oficina e instalacións de servizo”, indicou Louzao, que subliñou que parte da intervención está xa á vista: a rampla de entrada que salva a diferenza de altura do vestíbulo principal do edificio a respecto da praza do Obradoiro. “A partir dese vestíbulo principal abriuse un percorrido ata os andares inferiores, cunha escaleira e un elevador acristalados que baixan polo patio interior, e tamén ata os superiores, cun novo elevador accesible”, subliñou.

A rehabilitación afectou de maneira especial ao segundo andar, que quedou acondicionado para oficinas municipais, e ao baixo cuberta, onde se localizan servizos de ventilación e climatización que foron totalmente renovados.

No segundo piso sitúase unha das capelas, que foi restaurada, e catro plantas máis abaixo, no nivel da praza da Trindade, a segunda, que se situaba entre a cadea civil e a eclesiástica que houbo neste edificio. “A comunicación interior fará accesibles as plantas por debaixo da cota do Obradoiro e permitirá incorporar estas dúas capelas, agora recuperadas, á ruta de visitas. Deste xeito a veciñanza de Compostela e quen nos visite poderá coñecer a súa Casa do Concello e a memoria que garda”, sinalou a edila de Memoria Histórica.

A redacción do proxecto adxudicouse o 10/07/2023 á UTE RVR EZCURRA OUZANDE, cun importe de 276.626,57 € (IVE incluído), e foi aprobado con todas as autorizaciones sectoriais pertinentes o 30/09/2024. O adxudicatario da dirección e coordinación de seguridade e saúde foi Francisco Fernández Novás e a obra foi adxudicada o 24/03/2025 á empresa COPCISA SA, cun orzamento de 3.777.871,93 € (IVE incluído) e un prazo de execución de 12 meses.

Melloras en centros educativos

Na sesión de hoxe tomouse o acordo de segregar unha porción da parcela R.8 do Plan parcial do SUP-4 de Conxo e poñela a disposición da Consellería de Educación para construír nela un aulario de infantil, ampliando así as actuais instalacións do CEIP Cardeal Quiroga Palacios.

A parcela que se incorpora ao recinto escolar, lindeira con este, ten unha superficie de 1.812 m2 e 1.450 m2 de edificabilidade.

Así mesmo, adxudicouse o contrato das obras para a substitución da cuberta da Escola Infantil de Tras Parlamento a IAM RUMBO INSTALACIONES Y OBRAS SL, cunha oferta por valor de 237.761,41 € (IVE incluído).

Segundo sinalou a  tamén concelleira de Educación, a obra afectará ás dúas cubertas planas do edificio, unha delas transitable e outra axardinada, que teñen problemas de filtración de auga ao interior. Ademais de resolver a impermeabilización mellorarase tamén o illamento térmico dun edificio que vén empregándose como escola infantil desde 2011. Ten un prazo de execución de 100 días porque inclúe a adaptación do horario da obra á compatibilidade co funcionamento da escola.

Tamén se acordou o inicio da licitación das obras de reparación nas instalacións contra incendios do polideportivo do Monte dos Postes cun orzamento base de licitación de 77.374,88 € (base impoñible 63.946,18 € máis IVE do 21% por importe de 13.428,70 €).

“Abrimos agora o procedemento aberto simplificado de adxudicación  e as empresas terán un prazo de 10 días hábiles para presentar ofertas”, anunciou a edila de Educación que indicou que “o proxecto inclúe as actuacións necesarias no sistema de protección contra incendios que permitirán recuperar a capacidade do pavillón do CEIP Monte dos Postes e terá un prazo de execución de 2 meses nunha obra que tamén pode compatibilizarse co funcionamento da escola”.

Como consecuencia das deficiencias detectadas nun estudo para definir o número máximo de persoas que poderían utilizar diferentes instalacións municipais, realizado en 2020, este pavillón quedou limitado a un máximo de 100 persoas. O estudo sinalaba dificultades nas vías de evacuación e carencias no sistema de protección contra o lume. Como consecuencia encargáronse os informes valorativos e un proxecto técnico para resolver estes problemas e rehabilitar a capacidade da instalación, que volverá ser de 930 persoas.

Outros asuntos 

Nos puntos relativos á contratación rexeitouse o recurso de reposición interposto por URBASER contra a resolución do 29 de outubro de 2025 pola que se lle impuxeron penalidades polos incumprimentos na execución do contrato de servizos para a recollida convencional de residuos e limpeza viaria.

O importe total das penalizacións impostas, 20.025,37, correspondíase cos seguintes incumprimentos: pola falta dos medios persoais comprometidos, infracción cualificada como moi grave, 9.015,19 euros; pola falta e demora na posta a disposición do servizo da infraestrutura informática e tecnolóxica comprometida, infracción cualificada como grave, 3.005,06 euros; polo atraso na reposición/substitución de illas soterradas, infracción cualificada como leve, 1.000 euros; por non ter operativo un dos cuarteis para as brigadas de limpeza, infracción cualificada como leve, 1.000 euros; e polas deficiencias na limpeza e desinfección de contedores, infracción cualificada como grave, 6.005,12 euros.

A proposta de rexeitar o recurso que formulou o departamento de Contratación analiza cada unha das cuestións que a empresa recorreu, coa mesma argumentación empregada nos trámites de audiencia e alegación previos a que se resolvese o expediente. “Á vista de que os motivos das sancións están totalmente acreditados e que a súa imposición respectou todos os requisitos legais, confírmase plenamente a resolución anterior”, confirmou a concelleira.

Así mesmo, autorizouse a cesión provisional de uso do Estadio Municipal Verónica Boquete e do campo de adestramento de San Lázaro II a favor da SD Compostela durante a tempada 2026/27; e outorgáronse tres licenzas de obra maior.

Tamén se adxudicou o seguro de accidentes do persoal municipal a través da contrato baseado nun acordo marco da Central de Contratación da FEMP. O importe da prima é de 8.975,28 euros (exenta de IVE).