Brión abre inscricións na Feira Labrega, que terá lugar o 20 de setembro na praza das polbeiras

• A feira forma parte do Coworking Fest, que inclúe tres xornadas de portas abertas do espazo colaborativo de Monte Balado para o alumnado do CEIP de Pedrouzos

25 de agosto de 2026.- O Concello de Brión abre o prazo de inscrición nunha nova edición da Feira Labrega, que terá lugar o domingo 20 de setembro, en horario de 11:00 a 22:00 horas, na praza das polbeiras, a carón da carballeira de Santa Minia. Un espazo de exposición e venda de produtos frescos e elaborados que tamén incluirá obradoiros de oficios tradicionais, degustacións gastronómicas de produtos locais e actuacións musicais.

Aqueles pequenos produtores de Brión e da contorna que desexen participar nesta oitava edición da Feira Labrega poden anotarse e recibir máis información chamando ao 981 88 70 06, en horario de 9:00 a 14:00 horas. O emprazamento da feira estará condicionado ás condicións meteorolóxicas, que o ano pasado obrigaron ao seu traslado ao espazo colaborativo de Monte Balado.

A Feira Labrega de Brión está organizada polo Concello de Brión e conta coa colaboración da Xunta de Galicia, Deputación da Coruña, Ministerio de Agricultura, Pesca e Alimentación, Unión Europea, Xacobeo 2027, GDR Terras de Compostela, Xeodestino Terras de Santiago, Fundación Daniel & Nina Carasso e da asociación Daquídarredor.

Portas abertas

Un espazo colaborativo que celebrará tres xornadas de portas abertas para “sementar futuro e darlle maior visibilidade ao coworking entre o alumnado do CEIP de Pedrouzos e así tratar de captar novas persoas usuarias”, explica Guarina Rey, concelleira de Promoción Económica. Para conseguilo, a rapazada do colexio brionés visitará as instalacións de Monte Balado o martes 15, mércores 16 e xoves 17, en horario de 10:00 a 13:00 horas.

Trátase da segunda edición desta iniciativa, denominada “Coworking Fest”, que na súa primeira edición estivo dirixida tanto a persoal da Administración Local como a persoas que quixeran coñecer o funcionamento destas instalacións, que forman parte da Rede Provincial de Coworking da Deputación da Coruña. Guarina Rey sinala que “coa Feira Labrega e as visitas ao coworking buscamos poñer en valor o noso sector primario e promover o comercio de produtos locais e sostibles”. Uns produtos que, grazas ao coworking brionés, poden chegar ao mercado con todas as garantías sanitarias de que se producen e transforman dun xeito totalmente sostible.