A Sala Capitol e a Fundación Andrea únense nun concerto solidario co carismático Les Greene

O concerto de Les Greene, este mércores na Sala Capitol, servirá para recadar fondos para a Fundación Andrea nunha cita que combina música, diversión e compromiso social. Fran Villasenín fai balance dos seus dous anos á fronte da histórica sala compostelá, recentemente recoñecida como a mellor de Galicia.

A música, a solidariedade e o compromiso coa cidade daranse a man este mércores na Sala Capitol de Santiago de Compostela. O histórico recinto acollerá un concerto solidario protagonizado por Les Greene, unha das propostas máis vibrantes do panorama musical actual, nun evento organizado en colaboración coa Fundación Andrea, entidade que apoia a familias con nenos e nenas con enfermidades de longa duración.

A cita servirá tamén para celebrar o excelente momento que atravesa a Sala Capitol. O seu responsable, Fran Villasenín, fixo balance dos dous anos transcorridos desde que asumiu, xunto ao seu irmán, a xestión dun dos espazos culturais máis emblemáticos de Galicia.

«É un soño feito realidade«, asegurou Villasenín ao lembrar aquel momento no que recibiu as chaves da sala. Dous anos despois, recoñece que a responsabilidade segue sendo enorme, pero tamén gratificante. «A xente da cidade, de Galicia e os artistas están moi agradecidos. Iso significa que non o estamos facendo tan mal», sinalou.

O empresario destacou especialmente o recente recoñecemento recibido pola Capitol nos Premios Martín Códax da Música, onde foi distinguida como Mellor Sala de Concertos de Galicia. Un galardón que considera merecido e que chega tras máis dunha década na que o recinto non obtivera este recoñecemento.

«Estamos súper agradecidos e creo que é un premio merecido«, afirmou. Aínda así, quixo poñer en valor o traballo que realizan tamén as salas de menor tamaño, subliñando a dificultade de comparar proxectos moi diferentes dentro do mesmo sector.

Un concerto pensado para desfrutar e axudar

A conexión entre a Sala Capitol e a Fundación Andrea levaba tempo xestándose. Segundo explicou Villasenín, existía desde había tempo o desexo de colaborar coa entidade presidida por Charo Barca.

«Tiña moitas ganas de facer algo coa Fundación Andrea e estabamos esperando unha ocasión especial«, confesou.

Esa ocasión chegou coa volta de Les Greene a Santiago. O artista estadounidense deixou unha fonda pegada tras a súa actuación do pasado ano e, para Villasenín, protagonizou un dos concertos máis divertidos de 2025.

«Foi un dos concertos máis divertidos do ano pasado. É un tipo xenial«, destacou.

O espectáculo combinará soul, rhythm and blues, rock and roll e unha gran capacidade de conexión co público. Ademais, antes da actuación principal haberá unha homenaxe a Johnny Cash a cargo da banda Ring of Fire.

A Fundación Andrea, beneficiaria da recadación

Desde a Fundación Andrea, Charo Barca agradeceu profundamente a implicación da Sala Capitol e animou á cidadanía a participar nesta iniciativa solidaria.

«Estamos agradecidísimos a Fran, á Sala Capitol e a todas as persoas que fixeron posible este concerto a favor da Fundación«, manifestou.

Barca destacou que este tipo de eventos permiten achegar o labor da entidade a públicos que quizais aínda non coñecen a súa actividade.

«É unha oportunidade de visibilizar o noso traballo e tamén de conseguir fondos para seguir facendo todo o que facemos cada día«, explicou.

A presidenta lembrou que a Fundación Andrea mantén unha intensa actividade asistencial, apoiando familias desprazadas a outras cidades para tratamentos médicos, financiando servizos como fisioterapia, logopedia ou apoio psicolóxico, e impulsando proxectos de humanización hospitalaria en centros sanitarios galegos.

Entre as iniciativas máis recentes destacou a posta en marcha dunha nova sala de acollida no Hospital de Pontevedra, a finalización dunha sala de neonatos para ecografías no Clínico compostelán e a participación no futuro edificio de protonterapia.

«Os frentes son tantos e tan importantes que calquera achega é fundamental para seguir avanzando«, asegurou.

A Capitol como patrimonio emocional da cidade

Durante a entrevista, Villasenín tamén reivindicou o papel da Sala Capitol como parte da identidade cultural compostelá.

«A Sala Capitol é de todos os composteláns«, afirmou.

Segundo explicou, miles de persoas viviron nela momentos especiais ao longo de varias xeracións, desde concertos históricos ata a etapa na que funcionou como discoteca.

Por iso, considera importante reforzar a colaboración institucional para seguir apoiando a música en directo e facilitar oportunidades ás bandas emerxentes da cidade.

«Hai que coidar a Sala Capitol«, reclamou, incidindo na necesidade de seguir impulsando a actividade cultural e musical en Compostela.

Co concerto deste mércores, Capitol e Fundación Andrea ofrecen unha oportunidade perfecta para gozar da música en directo e, ao mesmo tempo, contribuír a unha causa solidaria que mellora a vida de centos de familias galegas. Unha noite para bailar, emocionarse e demostrar que a cultura tamén pode ser unha ferramenta de apoio e transformación social.