A TVG leva a Melide o primeiro casting televisado de ‘Recantos’

O auditorio do Centro Sociocultural Mingos de Pita de Melide acollerá o vindeiro 31 de maio unha das primeiras paradas de ‘Recantos: O Casting’, o novo formato da Televisión de Galicia que busca descubrir as mellores voces de Galicia para o emblemático espazo musical ‘Luar’.

Por primeira vez na historia da TVG, os castings de ‘Recantos’ serán televisados, nun programa que contará cun xurado profesional formado por rostros coñecidos do panorama galego e coa presentación de Duarte Galbán como mestre de cerimonias.

A organización fai un chamamento a todas aquelas persoas da contorna que teñan ganas de cantar e demostrar o seu talento. Para participar é necesario ser maior de 18 anos, non ter formado parte de anteriores edicións de ‘Recantos’ no ‘Luar’ e realizar inscrición previa.

‘Recantos: O Casting’ percorrerá as catro provincias galegas facendo parada en oito teatros, sendo Melide a primeira localidade desta nova aventura musical da Televisión de Galicia.