A XXVIII Festa da Troita de Oroso reivindica identidade, participación xuvenil e ambición cultural

•  Do 8 ao 10 de maio, Sigüeiro acolle unha programación diversa con máis de 800 quilos de troita, grandes orquestras e o pregón a cargo do alumnado do IES Oroso onde reivindicarán que “o luns despois da Troita sexa festivo local”

A Festa da Troita encara a súa 28ª edición consolidada como “a fin de semana máis importante do Concello”, en palabras do alcalde Álex Doval, quen destacou na súa intervención en Radio Líder Santiago o carácter identitario dunha celebración que “non só pon en valor un produto, senón que é un punto de encontro para veciños e visitantes”. A cita celebrarase o venres 8, sábado 9 e domingo 10 de maio, cun programa que combina gastronomía, música, tradición e participación cidadá.

Un dos eixos principais desta edición será novamente o protagonismo da mocidade. O pregón correrá a cargo de 14 alumnos do IES Oroso, nun formato que o goberno local consolidou desde 2024. “Non fai falta traer a ninguén de fóra para dar pregóns, témolos na casa”, reivindicou Doval . Pola súa banda, o director do centro, Jorge Otero, subliñou o valor educativo da experiencia: “Romper esa barreira escénica diante de centos de persoas é complicado, pero tamén é unha aprendizaxe moi valiosa”.

Un pregón con mensaxe: humor, reivindicación e identidade

Os propios alumnos avanzaron que o discurso incluirá agradecementos, pero tamén algunha “pulla” en clave de humor. Entre as propostas máis comentadas, unha petición directa ao goberno local: “o luns despois da festa da Troita debería ser festivo” .

“Falamos todos e escollemos as mellores ideas, despois escribímolo entre todos”, explicaron os estudantes, que contaron co apoio do profesorado. O pregón incluirá tamén mensaxes de inclusión e referencias á realidade do alumnado, seguindo a liña xa iniciada en edicións anteriores.

Máis de 800 quilos de troita e unha programación para todos os públicos

A dimensión gastronómica segue sendo clave. O Concello repartirá máis de 800 quilos de troita, de forma gratuíta en degustacións o sábado pola tarde e o domingo ao mediodía . Ademais, máis de 30 establecementos hostaleiros sumaranse ofrecendo este produto como tapa.

A concelleira de Cultura, María Requejo, destacou o esforzo organizativo: “É unha festa que implica a todo o Concello, desde a hostalería ata o persoal municipal”.

O programa inclúe:

O alcalde insistiu na idea de reforzar o sentimento de pertenza: “Estamos a traballar nun proxecto de identidade e orgullo de ser de Oroso, e esta festa é un elemento que nos une”.

Neste sentido, tamén destacou a colaboración institucional e privada, agradecendo o apoio de entidades como a Deputación, a Xunta e empresas colaboradoras. “De ben nacido é ser agradecido”, afirmou.

Pola súa banda, o director do IES puxo en valor a conexión entre o centro educativo e o Concello: “Calquera cousa que se pide, está feita ao día seguinte. Non sempre pasa isto noutros sitios”.

Os alumnos pregoeiros amosáronse ilusionados e satisfeitos co cartel: “Está moi chulo, este ano imos pasalo moi ben” . Na súa mensaxe final, convidaron á participación masiva: “Invitamos a toda a xuventude, de onde sexa, a que veña e o pase ben” .

E engadiron unha chamada ao civismo: “Que haxa sentido para que sexa unha festa de disfrute sen complicacións”.