Ames estimula o uso da lingua galega na actividade económica do concello

O alcalde e concelleiro de Normalización Lingüística, Blas García, dixo “o principal obxectivo destes premios é impulsar e normalizar o uso da lingua galega a nivel comercial. É moi importante usar o galego no ámbito económico e social porque serve para promocionar a nosa lingua, pero ademais crea referentes positivos. Todos os establecementos comerciais que levan un premio acaban sendo referentes para outras empresas para que poidan sumarse a esta campaña e participar nestes premios. Desde o Concello imos seguir apostando por este tipo de actividades para apoiar o uso do galego”

A concelleira de Promoción Económica, Ana Belén Paz, comezou destacando que “como dicimos sempre, en Ames témolo todo, e temos comercios e empresas da hostalería implicadas coa nosa lingua. Cada ano que pasa imos sumando empresas que se presentan, imos tendo novas empresas que poñen en valor e falan en galego. Cando nun comercio ou local hostaleiro se fala galego, ademais de poñer en valor a nosa lingua, estamos estimulando que a clientela tamén use a lingua galega”

Ames, 19 de outubro de 2026.- O Concello de Ames pon en marcha por noveno ano consecutivo os Premios Lingua e Empresa, co obxectivo de recoñecer o uso e fomento da lingua galega na actividade empresarial. Poderán optar a este recoñecemento todas as empresas, con sede social ou centro de actividade no concello de Ames, que presenten a súa candidatura antes do 20 de novembro. A dotación económica dos dous premios que se outorgan en cada unha das dúas categorías é de 1.500 euros. Un total de 75 empresas presentáronse a este certame nas oito edicións anteriores, das cales 18 foron premiadas. Premendo nestas ligazóns pódense descargar as bases do concurso e a ficha de participación.

O salón de plenos, na Casa do Concello, acolleu esta mañá a presentación da novena edición dos Premios Lingua e Empresa, nun acto no que estiveron presentes o alcalde e concelleiro de Normalización Lingüística, Blas García; a concelleira de Promoción Económica, Ana Belén Paz; a técnica do Servizo de Normalización Lingüística, Rosa Moreiras; e varios representantes de Xuntanza de Empresarios de Ames: Jorge López, Germán Mariño, Olaia Alvite e Beatriz López.

Trátase do noveno ano consecutivo no que se pon en marcha esta iniciativa co obxectivo de estimular o uso da lingua galega na actividade económica do concello de Ames, concretamente na actividade empresarial, e para recoñecer publicamente a contribución desde este sector ao aumento e á mellora do uso social do galego. Esta iniciativa está dirixida ás empresas que teñan a súa sede social ou un centro de actividade no concello de Ames.

Presentación dos premios Lingua e Empresa

O alcalde e concelleiro de Normalización Lingüística, Blas García, agradeceu “a colaboración de XEA e da Asociación de Empresarios do Novo Milladoiro porque é moi importante que as actividades que facemos no Concello conten co apoio e respaldo das distintas asociacións e colectivos municipais. Todas estas actividades que organizamos están dirixidas ao apoio do comercio local. O principal obxectivo destes premios é impulsar e normalizar o uso da lingua galega a nivel comercial. É moi importante usar o galego no ámbito económico e social porque serve para promocionar a nosa lingua, pero ademais crea referentes positivos. Todos os establecementos comerciais que levan un premio acaban sendo referentes para outras empresas para que poidan sumarse a esta campaña e participar nestes premios. Desde o Concello imos seguir apostando por este tipo de actividades para apoiar o uso do galego”.

A concelleira de Promoción Económica, Ana Belén Paz, comezou destacando que “como dicimos sempre, en Ames témolo todo, e temos comercios e empresas da hostalería implicadas coa nosa lingua. Teño que agradecer ás asociacións que poñen en valor esta iniciativa e que lle envían toda a documentación aos seus socios”. Ademais, explicou que “desde Promoción Económica hai pouco que publicamos unha guía de empresas de todo Ames, co cal tamén lle achegaremos a documentación a todas as empresas que figuran neste rexistro. Cada ano que pasa imos sumando empresas que se presentan, imos tendo novas empresas que poñen en valor e falan en galego. Cando nun comercio ou local hostaleiro se fala galego, ademais de poñer en valor a nosa lingua, estamos estimulando que a clientela tamén use a lingua galega”.

A técnica do Servizo de Normalización Lingüística, Rosa Moreiras, destacou que se trata “dunha actividade estable, xa que imos pola novena edición, a través da cal se pretende visibilizar a rede de empresas en galego do concello de Ames, e con isto estimular o uso da lingua galega na actividade empresarial e tamén recoñecer publicamente a contribución deste sector para o aumento e mellora do uso social da lingua galega. O galego é un activo moi importante para as empresas porque é unha marca de calidade, modernidade e de diferenciación neste mundo tan globalizado que temos agora mesmo, por iso é importante diferenciarnos. Ademais, achéganos modernidade, diferenciación, distinción, proximidade coa clientela, innovación e fiabilidade”.

O vogal de Xuntanza de Empresarios de Ames, Jorge López, dixo que “desde XEA apoiamos un ano máis esta iniciativa que tanto nos gusta. A maior parte das empresas recoñecidas nestes premios son asociados nosos, hai poucos que non o sexan, e parécenos importante a promoción que se fai do galego a través esta iniciativa, nun momento no que o galego está perdendo falantes. Desde XEA queremos aportar para que o galego continúe usándose no noso comercio e siga sendo unha marca de identidade. Estes premios son un estímulo para seguir reforzando o uso do galego entre o sector comercial”.

Bases da convocatoria

Os aspectos que se valoran para a concesión deste recoñecemento son a utilización do galego na comunicación interna e externa, tanto oralmente como por escrito, e o impacto que a actividade da empresa poida ter en sectores especialmente relevantes para o proceso de normalización lingüística.

Teranse en conta a páxina web e as redes sociais da empresa, se as utilizase, así como as campañas publicitarias ou materiais promocionais que empregue en calquera soporte. Tamén se valorará a sinaléctica e a comunicación do establecemento empresarial de cara á clientela (uso habitual do galego co seu público e nas súas actividades e servizos), así como entre o persoal e os diversos departamentos (se os houbese).

Para a comprobación deses méritos, as empresas candidatas deberán achegar os enlaces de información web correspondentes ou achegar materiais impresos, ademais de facilitar ao Concello toda a información que se lles requira sobre a súa comunicación interna e externa.

Categorías e dotación económica

A novena edición dos premios divídese, un ano máis, en dúas categorías. A primeira engloba ás empresas que teñen un uso consolidado e estable do galego dende hai máis de dous anos, mentres que a segunda recoñece a todas aquelas que naceron nos últimos dous anos ou que incorporaron o galego nese período. En ambos os casos a data que se toma como referencia é o 20 de novembro de 2024. As empresas que mudaron os seus usos lingüísticos para incorporar o galego deben acreditar os ditos cambios.

A dotación económica será de 3.000 euros, 1.500 para cada unha das categorías. Ademais, as gañadoras contarán cunha campaña de difusión en Ames Radio, a emisora municipal do concello.

Gala de entrega de premios

A Casa da Cultura do Milladoiro acollerá o luns, 14 de decembro, a gala de entrega de premios. Segundo dixo a técnica do Servizo de Normalización Lingüística, Rosa Moreiras, o máis importante da gala é que serve como “un encontro entre empresas moi diversas do concello de Ames, que forman parte da rede empresarial do municipio. A estes premios poden concorrer desde grandes empresas cun centro de actividade en Ames ata calquera persoa autónoma ou pequeno negocio. É un gala aberta, para que poida asistir calquera persoa que o desexe, e que conta cunha actuación. Nesta gala, antes non, é cando se desvelan as empresas recoñecidas polo xurado”.

Prazos de presentación das novas candidaturas

O prazo de presentación de novas candidaturas remata o día 20 de novembro de 2026 ás 14:00 horas.

As persoas interesadas deberán descargar e cubrir a ficha de participación que se pode atopar nesta ligazón e enviala ao correo electrónico normalizacion@concellodeames.gal, xunto coa documentación correspondente, ou presentala de xeito telemático a través da Sede electrónica do Concello de Ames. Para máis información ou para solicitar a ficha de participación pódese contactar co Servizo de Normalización Lingüística do Concello de Ames a través do número de teléfono 662 377 215 ou mediante o correo normalizacion@concellodeames.gal / promocioneconomica@concellodeames.gal.

As empresas non premiadas que se presentaron en 2025 e autorizaron a seguir sendo candidatas en edicións posteriores non terán que realizar ningún trámite nesta edición, a non ser que queiran achegar novos méritos.