Ames fai historia co Mundial de 100 quilómetros e sete títulos para o atletismo español

21 septiembre, 2026

O XXXIII Campionato do Mundo IAU de 100 quilómetros deixa unha xornada histórica para o atletismo español, con sete títulos mundiais por categorías de idade

Ames, 20 de setembro de 2026.- O Concello de Ames viviu hoxe unha xornada histórica coa celebración do XXXIII Campionato do Mundo IAU de 100 quilómetros, unha competición que reuniu en Bertamiráns atletas procedentes de 43 países e que deixou un extraordinario balance para o atletismo español.

A atleta manchega Gemma Arenas conseguiu a medalla de bronce na clasificación absoluta feminina cun tempo de 7:17:50, por detrás da estadounidense Courtney Olsen (7:10:31) e da xaponesa Miho Nakayama (7:11:57). Ademais, a súa marca permitiulle establecer un novo récord do mundo W45 nos 100 quilómetros, mellorando a anterior plusmarca da categoría.

A actuación de Arenas permitiulle tamén rebaixar a súa propia plusmarca española absoluta, que estaba en 7:20:57 desde o Campionato de España celebrado en Málaga en marzo deste ano. A nova marca de Ames supón unha mellora de 3 minutos e 7 segundos. A atleta proclamouse igualmente campioa do mundo W45.

O éxito español completouse coa prata na clasificación por equipos feminina. Gemma Arenas, María Romero, Carmen María Pérez e Estefanía Unzú conseguiron o subcampionato do mundo, por detrás de Croacia e por diante de Finlandia.

Sete campións do mundo españois por categorías de idade

A xornada deixou ademais unha destacada colleita de títulos para España nas categorías de idade, con sete campións do mundo. Xunto a Gemma Arenas, campioa do mundo W45, proclamáronse campións e campioas nas súas respectivas categorías:

Estefanía Unzú, campioa do mundo W40.
Carlos Gazapo Bravo, campión do mundo M40.
Manel Deli, campión do mundo M50.
Mari Carmen Fernández Crespo, campioa do mundo W55.
Juan Antonio Ramos Muñoz, campión do mundo M55.
Jon Arzubialde, campión do mundo M60.

Deste xeito, España sumou sete títulos mundiais individuais nas categorías de idade, nunha competición que permitiu aos atletas optar tanto á clasificación absoluta como aos campionatos correspondentes ás diferentes franxas de idade.

No apartado masculino da clasificación absoluta, Carlos Gazapo Bravo foi o primeiro español, ao finalizar na décima posición cun tempo de 6:31:09, nunha carreira na que o estadounidense Charlie Lawrence se proclamou campión do mundo con 6:09:25, por diante do lituano Aleksandr Sorokin (6:12:41) e do británico Alex Almagro (6:17:50).

Unha xornada histórica para Ames

O alcalde de Ames, Blas García, destacou a importancia da xornada para o municipio: “Hoxe Ames viviu unha xornada que vai quedar na historia do noso concello. Durante meses traballamos para facer posible este Campionato do Mundo e hoxe puidemos ver Bertamiráns convertido no centro mundial do ultrafondo. Ademais, tivemos a oportunidade de celebrar grandes resultados para España, co bronce de Gemma Arenas, o seu récord mundial W45 e o subcampionato mundial do equipo feminino”.

O rexedor municipal salientou tamén a dimensión internacional do acontecemento: “Centos de atletas, técnicos, acompañantes e afeccionados chegaron a Ames desde máis de 40 países. Isto permítenos proxectar a imaxe do noso concello internacionalmente e demostrar que Ames ten capacidade para organizar eventos deportivos da máxima dimensión”.

García agradeceu o traballo de todas as persoas e entidades implicadas na organización: “Quero agradecer o traballo da organización, do voluntariado, do persoal municipal, dos servizos sanitarios, das forzas de seguridade e de todas as entidades que colaboraron para que esta xornada se desenvolvese con éxito”.

Pola súa banda, o presidente do Comité Organizador, Francisco Rico, agradeceu a implicación do Concello de Ames e destacou o bo facer de todas as persoas e entidades que participaron na organización do campionato.

Ames, escenario do ultrafondo mundial

A celebración do Mundial converteu durante esta fin de semana as rúas de Bertamiráns no punto de encontro do atletismo internacional de ultrafondo. A proba, organizada polo Concello de Ames e o Club Ecodeporte, co apoio da Xunta de Galicia, a través da Consellería de Deportes e do Xacobeo 2027, e da Deputación da Coruña, permitiu amosar a capacidade do municipio para acoller unha competición deportiva de dimensión internacional.

A proba desenvolveuse sobre un circuíto urbano en Bertamiráns, con saída e chegada na rúa Alcalde Lorenzo, que os atletas tiveron que completar en 20 ocasións para alcanzar os 100 quilómetros.

O Mundial de Ames é, ademais, a cuarta edición do Campionato do Mundo de 100 quilómetros disputada en territorio español, despois das celebradas en Santander, Palamós e Los Alcázares.

Para o Concello de Ames, a xornada deixa así un balance histórico: un bronce mundial absoluto e un récord mundial W45 para Gemma Arenas, sete títulos mundiais individuais por categorías de idade, un subcampionato mundial feminino por equipos e unha competición internacional que reuniu en Bertamiráns atletas procedentes de 43 países.