Boiro contará co I campionato de remo indoor intercentros nos institutos do municipio

Boiro, 29 de setembro de 2026.- O Club de Remo Cabo de Cruz, coa colaboración do Concello de Boiro e Jealsa, promove o I campionato de remo indor intercentros nos tres institutos do municipio. O concelleiro de Deportes, Marcos Fajardo, participou na presentación xunto con Gustavo Vázquez, do Club de Remo Cabo de Cruz; Margarita Hermo, directora de Relacións Institucionais de Jealsa; e Manuel Pimentel, Pilar Barros e Xavier Figueira, mestres de educación física dos tres institutos.

Esta actividade ten como finalidade promover o deporte do remo e tamén realizar captación de deportistas. “Dende o Club de Remo traballamos cos institutos en distintas actividades e este ano sumamos esta modalidade do remo indoor para integrar esta unidade didáctica na programación”, afirmou Gustavo.

Participan nesta actividade máis de 160 alumnos de 1º da ESO do IES A Cachada, IES Praia Barraña e IES Espiñeira. Por parte do profesorado recoñeceron que “é unha actividade que funciona ben e está a gustar ao alumnado”.

Os alumnos e alumnas contarán como broche final deste proxecto e como axente motivador un campionato intercentros que terá lugar este venres 2 de setembro de 11.00 a 13.30 horas no pavillón da Cachada.

“Dende Jealsa entendemos que o deporte conecta a persoas e axuda a transmitir valores polo que apoiamos este proxecto de achegar o remo aos institutos”, recoñeceu Margarita Hermo. O concelleiro de Deportes, Marcos Fajardo, felicitou ao Club de Remo e aos institutos por esta iniciativa “e por dar a coñecer entre o alumnado un deporte como o remo indoor que está en auxe”.