Melide reparte os seus doces tradicionais nos puntos de doazón para difundir a XXXIV Festa do Melindre

• Melide impulsa un ano máis o reparto dos seus doces tradicionais nos puntos de doazón para difundir a XXXIV Festa do Melindre
• As accións comezarán o 29 de abril en Lugo e desenvolveranse tamén na Coruña, Santiago e Melide ata o 8 de maio, como antesala da cita dos días 9 e 10

O Concello de Melide colabora un ano máis coa Axencia Galega de Doazón de Órganos e Sangue nunha campaña de difusión da Festa do Melindre e da Repostaría Tradicional a través do reparto dos seus doces tradicionais nos puntos de doazón de sangue.

A iniciativa arrancará o vindeiro 29 de abril en Lugo, en horario de 09:30 a 14:30 horas, e continuará o 30 de abril na Coruña, de 15:30 a 21:00 horas. Xa no mes de maio, a campaña chegará a Santiago de Compostela o día 6, tamén en horario de tarde (15:30 a 21:00 horas), e rematará en Melide o 8 de maio, cunha xornada completa.

Durante estes días, as persoas que se acheguen a doar sangue recibirán melindres e outros doces tradicionais da vila, nunha acción coa que o Concello reforza a proxección da XXXIV Festa do Melindre, que se celebrará os días 9 e 10 de maio na localidade.

Esta proposta súmase a outras iniciativas desenvolvidas ao longo do ano para difundir a festa, como foron a presentación do cartel en Madrid no marco de Fitur, a promoción realizada en Foz durante o Certame de Baristas, ou a presenza recente en Santurtzi. Ademais, repartíronse 20.000 manteis de papel promocionais da festa entre establecementos de hostalería e restauración.

A XXXIV Festa do Melindre e da Repostaría Tradicional, declarada Festa de Interese Turístico Galego no ano 2013, rende homenaxe aos tres doces que identifican a tradición reposteira da vila (melindres, ricos e amendoados), elaborados nos fornos locais seguindo receitas transmitidas de xeración en xeración. A celebración naceu no ano 1991 por iniciativa do Concello co obxectivo de protexer e poñer en valor este saber facer.

Programa da XXXIV Festa do Melindre

Sábado, 9 de maio
11:00 horas: apertura da feira.
11:30–15:00 horas: animación de rúa coa charanga Achicoria e Herba Grileira.
13:00–14:00 horas: obradoiro doce ‘Coas mans na masa’, con Mary Mosteiro.
17:00–18:00 horas: maridaxe de viños e doces con Martín Ribeirao.
18:00 horas: Actuación de Herba Grileira na Praza das Coles.
18:30–19:30 horas: showcooking ‘Melide en petiscos: saborosa memoria da tradición doce’, con Manuel Garea.
20:00 horas: peche da feira.

Domingo, 10 de maio
11:00 horas: apertura da feira.
11:30 horas: animación de rúa con Froito Novo, Os da Taberna e a charanga Brassica Rapa.
12:00 horas: nomeamento de embaixadores e pregón no Cantón de San Roque.
13:00 horas: animación musical nas rúas.
17:30 horas: concerto infantil tributo ‘Lembra Xabarín’, no Cantón de San Roque.
18:00 horas: peche da feira.
19:00 horas: Actuación de Sabela na Praza das Coles.