O alcalde de Rianxo inicia unha nova xeira de encontros cos veciños de todas as parroquias

“Escoitar aos veciños e veciñas parroquia por parroquia, analizar as actuacións efectuadas ao longo deste primeiro ano de mandato e expoñer os proxectos previstos para os próximos meses”, así describiu o alcalde de Rianxo, Julián Bustelo, as xuntanzas parroquias que dende o Executivo que encabeza se impulsarán nas próximas semanas.

Cabe sinalar que fai uns meses tivo lugar a primeira xeira de encontros, nos cales os veciños e veciñas das diferentes parroquias lle puideron trasladar ao alcalde, así como aos demais membros do Goberno rianxeiro, as súas principais demandas e inquedanzas.

“Se ben semanalmente recibo na Alcaldía a numerosos veciños e veciñas para abordar asuntos moi variados, nestes encontros parroquiais temos ocasión de comentar entre todos e todas cuestións de interese xeral” sinalou o rexedor.

Bustelo tamén engadiu que se trata de “unha iniciativa pioneira que vén a darlle cumprimento a un dos compromisos adoptados durante a pasada campaña electoral, un compromiso que representa a nosa maneira de traballar, gobernar escoitando”.

Os primeiros encontros están fixados para o día 15 de outubro no Centro Sociocultural da Capela (Araño), o 17 na Casa da República (Isorna) e o 22 no Centro Cultural Vicente Vidal (Leiro).