Padrón leva a súa esencia a FITUR 2025: tradición, gastronomía e innovación turística

Chus Campos en Radio Líder Santiago

O Concello de Padrón consolídase como un destino turístico de referencia en Galicia, combinando tradición, gastronomía e cultura. Nunha entrevista realizada nos estudios de Radio Líder en Santiago, Chus Campos, responsable de turismo e festas, desvelou os proxectos e cifras que avalan este éxito.

Durante o pasado Nadal, Padrón destacou por converterse nun «pequeno Vigo», con actividades e iluminación que atraerón visitantes e veciños: “Houbo moitísima participación e xa estamos a planificar o Nadal seguinte,” comentou Campos. Este enfoque confirma o compromiso do concello coa dinamización das festas tradicionais, engadindo actividades innovadoras e familiares.

En canto ao turismo, os datos son reveladores: 170.000 peregrinos pasaron por Padrón no 2024, unha cifra que non inclúe visitantes ocasionais nin excursións organizadas. Para incrementar a estadía e o atractivo turístico, Campos sinalou o esforzo por diversificar a oferta: “Queremos que as familias disfruten da nosa natureza e gastronomía, prolongando a súa visita.”

Padrón tamén estreará proxectos ambiciosos como a renovación do casco antigo e a construción de novos hoteis, o que reforzará a súa capacidade de acollida. A representación na feira internacional de turismo FITUR 2025, será outro paso clave, cunha imaxe destacada no Pavillón de Galicia e actividades promocionais: “Presentaremos a nosa oferta gastronómica e cultural, como as Xornadas da Lamprea, que atraen milleiros de visitantes cada ano.”

Non faltou mención aos plans futuros, como as festas da Pascua e a aposta por unha infraestrutura máis accesible, facendo referencia á reivindicación de gratuidade na AP9. Campos pechou a entrevista destacando o carácter acolledor de Padrón: “É un concello conectado con toda Galicia, un lugar tranquilo para disfrutar da nosa hospitalidade.”

Tes a entrevista completa no seguinte enlace.