Programa especial de Radio Líder desde Bertamiráns para celebrar as Prebadaladas

Radio Líder Santiago sumará un toque especial ás celebracións do Nadal no Concello de Ames este martes 31 de decembro cun programa en directo desde a Praza do Concello, en Bertamiráns. O especial, que se emitirá de 10.00 a 13.00 horas, será a antesala perfecta para as Prebadaladas, un dos actos máis significativos destas festas na localidade.

Durante o programa, os oíntes poderán gozar de entrevistas en directo, conexións co público presente e unha cobertura completa da atmosfera festiva. Ademais, haberá intervencións da cantante Fátima Prego, encargada de presentar as Prebadaladas, así como das gañadoras do concurso Canta con Ames, cuxa actuación incluirá linguaxe de signos.

O equipo de Radio Líder tamén destacará as iniciativas inclusivas que caracterizan este evento, como as mochilas vibratorias para persoas con discapacidade auditiva, e informará sobre o reparto de bolsas festivas con doces, batidos e cotillón.

A emisión incluirá momentos musicais, reportaxes e un espazo dedicado a destacar a riqueza cultural e social do municipio. Este programa en directo será unha oportunidade única para compartir coa audiencia a máxica despedida do ano que organiza Ames.

NOTICIA RELACIONADA: 

Ames celebrará unhas Prebadaladas accesibles a persoas con discapacidade auditiva