Santiago acollerá o España-Grecia de baloncesto na loita por unha praza no Mundial

O conselleiro de Presidencia, Xustiza e Deportes, Diego Calvo, participou hoxe, xunto coa presidenta da Federación Española de Baloncesto, Elisa Aguilar, na presentación do encontro entre as seleccións masculinas de España e Grecia. Calvo estivo acompañado polo secretario xeral para o Deporte, Roberto García, e polo director de Turismo de Galicia, Xosé Merelles.

O partido disputarase o domingo 29 de novembro no Multiúsos Fontes do Sar e corresponde á última rolda de clasificación para a Copa do Mundo de Qatar 2027. Será o primeiro encontro oficial que a selección masculina española dispute en Santiago de Compostela e resultará clave para as súas aspiracións de conseguir unha das prazas que dan acceso ao Mundial.

Calvo aproveitou a presentación para lembrar o bo momento do baloncesto galego, con tres equipos na máxima categoría masculina, outros tres na feminina e máis de 20.200 licenzas federativas. O conselleiro sinalou que a presenza da selección española en Santiago contribuirá a proxectar Galicia como sede de grandes eventos deportivos.

Pola súa banda, Merelles salientou que os eventos deportivos contribúen a promocionar Galicia e a atraer visitantes, especialmente dos mercados internacionais. Tamén destacou o apoio da Xunta a competicións de distintas disciplinas a través do Plan Director de Patrocinios do Xacobeo 2027. En 2025, o turismo deportivo atraeu a Galicia 118.000 visitantes, que xeraron un gasto total de 31 millóns de euros.