Tordoia mantén a vixilancia sobre o vertido ante a súa posible chegada ao Tambre

O comité de coordinación constituído para facer seguimento do vertido en Tordoia volveu reunirse a última hora da tarde deste mércores para analizar a evolución da situación e preparar as actuacións necesarias ante unha eventual afección ao abastecemento de auga.

Durante a reunión valoráronse os últimos datos dispoñibles sobre o avance do vertido. Segundo a información facilitada polo servizo de Santiago, a súa evolución está a ser lenta.

Ante os posibles escenarios, o comité realizou previsións para afrontar un eventual corte da subministración. Tamén se estudaron medidas destinadas a protexer a rede municipal fronte a unha posible contaminación e evitar problemas derivados dunha perda de presión.

Ademais, solicitouse formalmente e por escrito a Augas de Galicia información e unha valoración técnica detallada sobre a evolución do vertido. En concreto, requiríronse datos sobre a previsión da súa chegada ao río Tambre, as medidas adoptadas ata o momento, os sistemas de monitorización postos en marcha e os mecanismos de coordinación operativa entre as administracións e servizos implicados.

O comité continuará pendente da evolución do episodio e da información técnica dispoñible para adaptar as medidas de prevención e resposta ás circunstancias.