Un minuto de silencio en Santiago e comarca ás 20:00 horas polas vítimas de Toledo

A cidadanía está chamada a participar este mércores, ás 20.00 horas, nun minuto de silencio diante das casas consistoriais.

Santiago e as comarcas da contorna súmanse este mércores á homenaxe ás vítimas do accidente ferroviario rexistrado na provincia de Toledo. O minuto de silencio terá lugar ás 20.00 horas diante das casas consistoriais, como mostra de dó e solidariedade coas persoas afectadas e as súas familias.

A iniciativa responde ao chamamento da Federación Española de Municipios e Provincias (FEMP), que convidou as entidades locais de toda España a participar nesta lembranza colectiva.

A federación trasladou o seu máis sentido pésame ás familias e persoas achegadas das vítimas e agradeceu o traballo dos servizos de emerxencia e dos equipos que desenvolven os labores de atención e asistencia na zona do sinistro.

Así mesmo, a FEMP púxose á disposición das administracións para colaborar na coordinación das tarefas de protección civil e atención ás emerxencias. A convocatoria está aberta á cidadanía como un xesto compartido de respecto e lembranza das vítimas.