Un vehículo atropela unha vaca en Corexo, onde a veciñanza leva anos reclamando medidas polo gando solto

Cedida

Un vehículo atropelou esta tarde unha vaca en Corexo, na parroquia compostelá de Marrozos. O condutor resultou ileso, mentres que o animal sobreviviu ao impacto, aínda que quedou visiblemente ferido. Polo momento, non se localizou o seu propietario.

O accidente prodúcese nunha zona onde a veciñanza leva anos denunciando a presenza de gando sen control nas estradas e nas propiedades particulares. Os residentes alertan do risco para a seguridade viaria, especialmente na DP-8203, e dos danos que os animais causan nas hortas e nas colleitas.

As queixas trasladáronse de maneira reiterada a distintas administracións e corpos policiais, acompañadas de fotografías e vídeos. A situación tamén foi levada ao Valedor do Pobo. Pola súa banda, o PP pediu medidas para mellorar a situación e atender as reclamacións veciñais.

Os residentes describen unha convivencia conflitiva co gandeiro ao que atribúen a presenza habitual de animais soltos e denuncian episodios de tensión e intimidación. Aseguran que a falta dunha solución prolonga un problema que afecta á súa tranquilidade e á seguridade de quen circula pola zona.

Tras este novo accidente, a veciñanza insiste na necesidade de actuar para garantir o control do gando e evitar novos sinistros que poidas acabar nunha desgraza.