Verea propón unha axuda de ata 80 € ao mes por fillo para pagar o autobús escolar

• ColeBus será unha axuda directa ás familias, sen límite de renda, para financiar o transporte escolar organizado polos centros concertados.
• A medida podería retirar centos de vehículos das rúas nas horas punta, xa que o 70 % do alumnado da concertada se concentra no eixo entre a Praza de Galicia e San Caetano.
• “Queremos facer de Santiago a cidade de Europa que máis pense nos pais e nas nais”, afirmou o líder popular.

O líder do Partido Popular de Santiago, Borja Verea, presentou este luns ColeBus, unha nova axuda municipal de ata 80 euros ao mes por fillo para que os pais e nais poidan sufragar o transporte escolar organizado polo seu centro educativo.

Verea explicou que a proposta coincide co inicio do curso escolar e responde á realidade diaria de miles de familias compostelás, que cada mañá teñen que facer encaixar os horarios dos colexios, o traballo, as actividades extraescolares e o resto das obrigas familiares.

“Levamos meses falando de pais e nais porque, se queremos un Concello que entenda a vida real das persoas, ten que entender tamén o que significa hoxe ter fillos e organizar unha familia”, sinalou.

Neste sentido, o líder popular asegurou que “os pais e as nais van ser unha prioridade absoluta do próximo goberno municipal” e marcou como obxectivo “facer de Santiago a cidade de Europa que máis pense nos pais e nas nais”.

A filosofía, segundo explicou, é que cada vez que o Concello organice un servizo teña en conta os horarios das familias; que cando deseñe a mobilidade pense en quen leva os nenos ao colexio; que cando programe actividades considere as vacacións escolares; e que, cando unha familia teña un imprevisto, saiba que conta cun Concello ao seu lado.

ColeBus consistirá nunha axuda directa ás familias de ata 80 euros ao mes por fillo para sufragar o transporte escolar organizado polos centros concertados. A contía non dependerá do nivel de renda familiar e quedarán excluídos os colexios privados.

Se o custo mensual do transporte é inferior a 80 euros, a axuda adaptarase ao prezo real do servizo. Se é superior, o Concello achegará un máximo de 80 euros por alumno e mensualidade.

“O funcionamento será moi sinxelo. O Concello non vai organizar rutas nin autobuses. Cada centro poderá organizar o seu servizo en función das necesidades dos seus alumnos e o Concello axudará aos pais e nais a pagalo”, explicou Verea.

Serán, polo tanto, os propios colexios os que determinen onde existe demanda, de que zonas proceden os alumnos e que percorridos deben realizarse, mentres que o Concello se encargará de financiar o servizo a través das axudas ás familias.

O líder popular destacou que a proposta responde, en primeiro lugar, a unha cuestión de igualdade. Actualmente existe transporte escolar financiado por outras administracións para determinados alumnos dos centros públicos, pero esa posibilidade non está dispoñible nas mesmas condicións para os estudantes dos centros concertados.

“Para nós hai un principio moi sinxelo: todos os nenos de Santiago son iguais, independentemente do colexio ao que vaian. E os seus pais e nais tamén”, afirmou.

Por este motivo, o PP quere que as familias que actualmente teñen que asumir o custo do autobús escolar poidan contar coa axuda económica do Concello.

Verea considerou que este financiamento permitirá tamén que colexios concertados que actualmente non dispoñen de transporte escolar poidan poñer en marcha novas rutas adaptadas ás necesidades dos seus alumnos.

Unha medida para transformar a mobilidade

Verea destacou que ColeBus tamén é unha proposta para mellorar a mobilidade da cidade. Cada mañá centos de pais e nais collen o coche practicamente á mesma hora para levar os seus fillos ao colexio, o que provoca máis tráfico, maiores dificultades para aparcar e máis tempo perdido nos desprazamentos.

“Cada neno que poida ir ao colexio en autobús pode ser un coche menos nas rúas de Santiago nas horas punta”, subliñou.

Neste sentido, explicou que, dos 4.500 alumnos dos centros concertados, aproximadamente 3.100, o 70 %, concéntranse no eixo comprendido entre a Praza de Galicia, Virxe da Cerca e San Caetano, unha das zonas que soporta maiores problemas de circulación nas horas de entrada e saída dos colexios.

“A ninguén se lle escapa o que ocorre a determinadas horas do día nese eixo. ColeBus é unha medida de igualdade, pero tamén unha medida transversal de transformación da mobilidade en Santiago”, afirmou.

O líder popular aclarou que a intención non é obrigar a ningunha familia a utilizar o transporte escolar nin decidir como debe levar os seus fillos ao colexio, senón ofrecerlle unha alternativa.

“Se podemos facerlles a vida máis fácil a centos de pais e nais e, ao mesmo tempo, retirar centos de vehículos das rúas nas horas de maior tráfico, merece a pena facelo”, asegurou.

Unha política municipal pensada para as familias

Borja Verea enmarcou ColeBus dentro da batería de propostas para as familias presentada polo Partido Popular durante os últimos meses.

Entre elas figura que o Concello asuma a organización das actividades extraescolares, evitando que esta carga recaia sobre as ANPAS e facilitando a conciliación dos pais e nais.

O PP tamén propuxo un programa para que todos os alumnos de terceiro da ESO poidan realizar durante o verán unha estadía de inmersión lingüística en Irlanda, así como a creación de novos campamentos por toda Galicia.

A estas iniciativas súmanse a Parada Familiar, para que deixar un neno no colexio, acudir á farmacia ou facer unha xestión rápida non se converta cada mañá nun problema de aparcamento; unha Bolsa Familiar de Zona Azul, con horas gratuítas de estacionamento para os pais e nais; e un servizo municipal de canguraxe pensado para atender os imprevistos das familias.

“Extraescolares, campamentos, Irlanda, Parada Familiar, Bolsa Familiar de Zona Azul, canguraxe e agora ColeBus non son medidas illadas. Son unha forma de entender a cidade”, asegurou Verea.

“Quero que calquera pai ou nai de Santiago saiba que terá un Concello ao seu lado. E quero que Santiago teña unha ambición que probablemente ningunha outra cidade se marcou ata agora: ser a cidade de Europa que máis pense nos pais e nas nais. Ese é o Santiago que queremos construír”, concluíu.