Xogadores da Chave, tras a súa exclusión do programa do Apóstolo: «O torneo celebrarase igual»

O presidente da Asociación de Xogadores da Chave, José Fuentes, asegura que o torneo se celebrará con normalidade este venres e sábado na Alameda, lamenta que a cita non figure na programación oficial das Festas do Apóstolo e confía en que todo responda a «un malentendido»

A tradición volverá ter o seu espazo nas Festas do Apóstolo. O histórico Torneo da Chave celebrará esta fin de semana a súa 48ª edición na Alameda de Santiago, mantendo unha das competicións máis emblemáticas do calendario festivo compostelán, aínda que este ano cunha circunstancia inédita: non figura na programación oficial das festas. Así o explicou en Radio Líder Santiago o presidente da Asociación de Xogadores da Chave, José Fuentes, quen quixo lanzar unha mensaxe de tranquilidade aos afeccionados: «Chave vai haber, sen ningún problema ningún».

Fuentes recoñeceu a súa sorpresa pola ausencia do torneo no programa municipal, aínda que evitou alimentar a polémica e atribuíu a situación a «un malentendido» derivado da redución da duración das Festas do Apóstolo. «Ao reducir as festas foi onde veu o problema», explicou, antes de destacar que o Concello continúa colaborando coa organización achegando os premios da competición.

A pesar desta circunstancia, a Asociación mantén intacta a organización do torneo, que comezará este venres pola tarde coa competición feminina e continuará o sábado coa categoría masculina na Alameda. «A Chave está viva», reivindicou Fuentes, quen lembrou que este deporte tradicional leva preto de medio século formando parte das celebracións compostelás e continúa sumando novos practicantes.

«O importante é que a tradición non se perda», afirmou o presidente da entidade, que destacou o bo momento que atravesa este deporte. Segundo explicou, o pasado Torneo da Ascensión bateu expectativas con 31 parellas participantes, unha cifra que agardan repetir nas festas patronais. Ademais, asegurou que cada vez hai máis presenza de xente nova. «Todo é empezar; cando lle dás unha vez, queres volver dar outra máis», sinalou sobre a capacidade da chave para enganchar ás novas xeracións.

Actualmente, a Asociación organiza unha liga local con once equipos de Santiago, unha competición que se desenvolve ao longo do ano e que, segundo lembrou Fuentes, chegou no seu día a contar con equipos doutras cidades galegas. «Foi unha pena perder aquela competición a nivel de Galicia», confesou, lembrando os enfrontamentos con clubs da Coruña, Ferrol, Vigo ou Ourense.

Respecto á ausencia no programa oficial das festas, o presidente da Asociación mostrouse convencido de que a situación poderá corrixirse de cara ao futuro. De feito, confirmou que mantivo unha reunión coa concelleira de Deportes para aclarar o sucedido e expresou o seu desexo de que a 49ª edición recupere a súa presenza na programación municipal. «Con boas palabras», resumiu sobre o espírito co que afronta o encontro institucional.

Mentres tanto, o chamamento é claro: acudir á Alameda para apoiar un deporte que forma parte da identidade popular compostelá desde hai décadas. «A Chave vai para adiante», insistiu José Fuentes, convencido de que a mellor maneira de defender esta tradición é seguir enchendo de participantes e público un torneo que, malia os contratempos, continúa sendo unha das grandes referencias do deporte tradicional galego.