Rianxo avanza na eficiencia do gasto municipal cun aforro de 100.000 euros na factura eléctrica

O Concello de Rianxo vai licitar o contrato de subministración de enerxía eléctrica das instalacións municipais, unha actuación que permitirá ao Concello regularizar a situación actual do servizo e a través da cal se prevé reducir en aproximadamente 100.000 euros o gasto anual en electricidade.

O contrato, tramitado a través do Acordo Marco da Central de Contratación da Federación Española de Municipios e Provincias (FEMP), terá unha duración inicial dun ano e un custo de 514.821,65 euros (IVE incluído).

A actuación súmase ao plan de revisión do servizo impulsado polo Executivo de Julián Bustelo e grazas ao cal xa a factura eléctrica baixou nuns 200.000€ nestes últimos tres anos.

O contrato formalízase a prezo fixo, cunha vixencia dun ano, o que garante a estabilidade do custo do subministro durante todo o período.

Esta contratación enmárcase no sistema de compra centralizada da FEMP, ao que o Concello das Rianxo está adherido desde fai uns meses. En palabras de José Alberto Angueira, concelleiro de Obras e Servizos, “a licitación do subministro eléctrico municipal é un proceso complexo que require meses de tramitación. Tras un estudo comparativo das condicións ofrecidas polas empresas do mercado, e analizado o concurso nacional impulsado pola Federación Española de Municipios e Provincias (FEMP), optamos por sumarnos a este acordo marco que permite ás entidades locais acceder a prezos máis competitivos e simplificar os procedementos administrativos, garantindo ao mesmo tempo a transparencia na contratación pública.”

Con este novo contrato, o Concello de Rianxo reforza a súa aposta por unha xestión eficiente e responsable dos recursos económicos combinando seguridade xurídica transparencia nos procesos de contratación co aforro económico, “empregando eses cartos que se utilizaban para o subministro eléctrico noutros servizos públicos e necesidades do municipio”, remarca Angueira.