Boiromotos 2026 encherá o Parque da Cachada de motor, exhibicións e música

O Parque da Cachada será o escenario, os días 24, 25 e 26 de xullo, dunha nova edición da concentración moteira Boiromotos 2026, organizada polo Motoclub Boiromotos coa colaboración do Concello de Boiro. O evento ofrecerá durante toda a fin de semana un amplo programa de actividades para persoas inscritas e público en xeral, con exhibicións, exposicións, actividades infantís, música e gastronomía.

A programación arrancará o venres 24 ás 17.00 horas coa apertura das inscricións e a instalación de inchables. A xornada incluirá adestramentos de coches radio control Crawler a cargo do Club Barbanza 4×4 Sport RC, unha exhibición de enduro con motos vintage e, pola noite, cea para as persoas inscritas e unha verbena amenizada por DJ MaikStyle, DJ Matrek e DJ Goro.

O sábado 25 concentrará boa parte das actividades. A partir das 11.00 horas abrirá unha exposición de motos oldies e clásicas organizada por Old School Galician e Arousa Team, que contará ademais cun espazo reservado para Ducati con motivo do seu centenario. Ao longo do día desenvolveranse cursos de seguridade viaria para nenos e nenas, exhibicións e probas de coches radio control, xogos, inchables, concursos de motos oldies e clásicas e unha mexilloada.

Un dos momentos máis agardados chegará ás 19.30 horas coa exhibición de stunt protagonizada polo piloto Emilio Zamora. A xornada rematará cunha nova cea para as persoas inscritas e unha verbena coa música de DJ Manu X, DJ Tito Maverick e DJ Places.

A concentración concluirá o domingo 26 cun almorzo para as persoas participantes, seguido dunha ruta libre con saída ás 10.30 horas e dunha comida de despedida prevista para as 14.15 horas.

Boiromotos consolídase así como unha das citas de referencia do calendario moteiro estival na comarca, combinando a paixón polas dúas rodas cun programa pensado para o desfrute de públicos de todas as idades.