A Estrada proxecta un novo pulmón verde e unha zona de estacionamento na Carballeira de Melania

• O goberno local chegou a un acordo coa trintena de propietarios dos 14 solares para a súa cesión de uso mediante arrendamento.
• A actuación abrangue uns 6.000 metros cadrados entre as rúas Gradín e San Antón.
• O proxecto prevé conservar o arborado existente, crear paseos e abrir novas conexións peonís coa contorna urbana.

A Estrada, 29 de agosto de 2026.- O Concello da Estrada avanza na creación dun novo recinto de esparexemento na zona centro da capital estradense, na contorna popularmente coñecida como Carballeira de Melania. O goberno que encabeza Gonzalo Louzao chegou a un acordo cos propietarios dos 14 solares que conforman este espazo para dispoñer dos terreos mediante un arrendamento e destinalos ao uso público.

O Concello traballa xa na redacción do proxecto, cuxos detalles se darán a coñecer unha vez completado o deseño, previsiblemente durante o mes de setembro. A actuación abranguerá unha superficie aproximada de 6.000 metros cadrados, enmarcada polas rúas San Antón e Gradín, nunha zona céntrica que actualmente se atopa en desuso.

A pesar de tratarse de 14 solares, a negociación municipal implicou contactar cunha trintena de titulares diferentes. Segundo explicou o alcalde, alcanzouse un acordo con todos eles polo que o Concello abonará un alugueiro anual para poder destinar estes terreos á creación do novo recinto público.

A aposta pola Carballeira de Melania quedou xa reflectida nos orzamentos municipais de 2026, que incorporaron unha partida de 200.000 euros para impulsar a creación dun novo pulmón verde no centro da Estrada. A iniciativa pretende aproveitar as especies arbóreas existentes e abrir este espazo ao uso e desfrute da cidadanía.

Á espera de que o proxecto técnico concrete definitivamente a distribución da superficie, a intención do goberno local é combinar a zona verde cunha área destinada ao estacionamento público, situada na parte máis próxima á urbanización de chalés existente a carón da igrexa parroquial de San Paio.

O Concello tamén estudará a apertura do recinto á malla urbana que o rodea. Neste sentido, valorarase a retirada do muro que actualmente separa os terreos da rúa San Antón e que constitúe unha importante barreira visual entre a carballeira e o resto do casco urbano.

A futura zona verde conservará, na medida do posible, a estrutura natural do terreo. A actuación prevese como unha humanización respectuosa coa vexetación e co arborado existente, aproveitando especialmente as zonas de sombra para configurar paseos e espazos de estancia, que se completarán coa instalación de mobiliario urbano.

O proxecto técnico deberá resolver tamén aspectos derivados da propia configuración do terreo, como a pendente existente e as medidas necesarias para garantir a seguridade ante as diferenzas de nivel.

Louzao avanzou, ademais, que a intención municipal é dotar a Carballeira de Melania de accesos tanto desde Gradín como desde a rúa San Antón. Deste xeito, ademais de crear unha nova zona verde e de lecer no centro da vila, o futuro parque funcionará como unha conexión peonil entre estas dúas vías do casco urbano.