Boqueixón presente en Fitur «por triplicado»

O Concello de Boqueixón, representado polo seu alcalde Ovidio Rodeiro, estivo presente hoxe en Fitur «por triplicado».

Co GDR Terras de Compostela, presentando a campaña «Terras de Santiago. Distintas maneiras de desfrutar da auga» xunto ao delegado do Goberno en Galicia, Pedro Blanco; a directora de promoción de Turismo de Galicia , Carmen Pita; a actriz María Vázquez; a presidenta do GDR, Guarina Rey; e representantes dos concellos integrados na agrupación.

Cos amigos e amigas da Asociación Cultural da Filloa de Lestedo, que compartiron esta esquisitez gastronómica cos presentes e puxeron en valor a Festa da Filloa de Lestedo, apoiando que merece ser declarada de Interese Turístico Nacional.

E co Camino Miñoto Ribeiro, defendendo a oficialidade dunha fermosa ruta xacobea que vai dende Braga (Portugal) ata Santiago de Compostela.