Traxedia en Brión: falece unha nena de dous anos esquecida no coche

Unha nena de dous anos faleceu en Brión tras permanecer durante horas encerrada no coche do seu pai. O home saíra pola mañá cos seus dous fillos: deixou ao maior no colexio e tiña que levar a pequena á gardería, pero unha chamada telefónica fixo que se despistase e fose directamente ao seu negocio, esquecendo que a nena seguía no vehículo.

O pai estivo traballando durante toda a mañá e parte da tarde sen decatarse do ocorrido. Sobre as tres da tarde, a nai foi recoller á pequena á gardería e descubriu que nunca chegara. Nese momento os pais déronse conta da traxedia e avisaron aos servizos de emerxencia.

A menor foi trasladada ao PAC de Bertamiráns, onde entrou en parada cardiorrespiratoria e acabou falecendo, agravado todo polas altas temperaturas e a deshidratación.

A Garda Civil investiga agora o sucedido, un caso que conmocionou aos veciños de Brión.