O BNG pide que Lalín sexa declarada zona tensionada para conter os prezos do alugueiro

Os nacionalistas presentan unha moción para que o Concello inicie os trámites ante a Xunta e impulse medidas que faciliten o acceso á vivenda.

O BNG de Lalín propón que o municipio sexa declarado zona de mercado residencial tensionado co obxectivo de frear o encarecemento dos alugueiros e mellorar as posibilidades de acceso á vivenda.

A formación nacionalista solicita ao Concello que poña en marcha os estudos necesarios para tramitar esta declaración ante a Xunta de Galicia. Tamén reclama a creación dun grupo de traballo no que participen colectivos veciñais.

Segundo os datos achegados polo BNG, entre o 28 % e o 36 % das vivendas do municipio estarían baleiras, mentres que 41 propietarios acumulan máis de dez inmobles cada un.

Con esta iniciativa, os nacionalistas buscan abrir o debate sobre a situación da vivenda en Lalín e promover medidas que permitan ofrecer alugueiros máis accesibles á veciñanza.