O Composala busca prolongar o seu pleno de vitorias na cancha do Xove F.S.

O Composala afronta esta fin de semana outro desafío esixente no seu debut na categoría. O líder do grupo en 2ª B de fútbol sala viaxará ata a comarca da Mariña para medirse á S.D. Xove F.S., co claro obxectivo de prolongar o seu gran estado de graza.

O bloque dirixido por Gabi Rama chega no máis alto da táboa tras asinar un arranque impecable. Cun pleno de 9 puntos en tres xornadas, o cadro santiagués quere dar continuidade á solidez exhibida nesta ilusionante estrea na competición.

Non será unha empresa fácil. En fronte estará unha S.D. Xove F.S. que destaca por ser un rival moi experimentado na categoría e forte ante a súa afección. O cadro lucense solventou con vitoria o seu único encontro na casa, confirmando a dificultade dun feudo rochoso que esixirá a mellor versión dos composteláns.

O choque disputarase este sábado 10 de outubro ás 18:15 horas no Pavillón Municipal de Xove.

Declaracións

Brais Aldrey: «Chegamos nunha dinámica moi boa tras lograr un pleno de vitorias que nos sitúa líderes, o que nos fai afrontar o encontro con moitísima ilusión. Sabemos que para manternos arriba toda a tempada debemos seguir traballando e competindo a este gran nivel».

Gabi Rama: «Viaxamos a unha pista moi complicada como é a de Xove. Un gran rival, un equipo con moito talento e veteranía na categoría que nos vai poñer as cousas moi difíciles. Imos coa máxima ilusión, que é o que nos está impulsando a conseguir estes grandes resultados. A partir de aí, o noso obxectivo é converter o encontro nun partido moi interesante e disputado de ti a ti, onde loitaremos por levarnos o maior botín de puntos posible».