O Goberno e Ribeira reforzan a coordinación para manter a seguridade no municipio

O delegado do Goberno en Galicia, Pedro Blanco, mantivo este luns unha reunión en Santiago coa alcaldesa de Ribeira, María Sampedro, para analizar a situación da seguridade no municipio e abordar as principais cuestións relacionadas coa coordinación entre ambas administracións.

Durante o encontro, os dous responsables coincidiron en salientar a importancia da colaboración permanente entre o Goberno de España e o Concello de Ribeira para ofrecer unha resposta eficaz ás necesidades da veciñanza e seguir reforzando a protección cidadá.

Pedro Blanco trasladou unha mensaxe de tranquilidade á cidadanía e asegurou que Ribeira é unha localidade segura, unha situación que atribuíu tamén ao labor diario das Forzas e Corpos de Seguridade do Estado. Neste sentido, reafirmou o compromiso do Goberno de España de continuar traballando en estreita colaboración co Concello para manter os actuais niveis de seguridade e afrontar con garantías os novos retos que poidan xurdir.

Ao remate da reunión, Pedro Blanco e María Sampedro acordaron celebrar unha nova xuntanza nas próximas semanas en Ribeira, coincidindo coa visita institucional do delegado do Goberno ás instalacións da comisaría da Policía Nacional da localidade.