O PSOE reclama avances na municipalización dos aparcadoiros de Praza de Vigo e Praza de Galicia

A concelleira do Grupo Municipal Socialista Marta Abal criticou a falta de planificación do goberno de Goretti Sanmartín na municipalización dos aparcadoiros de Praza de Vigo e Praza de Galicia. A edil pronunciouse despois de que o executivo local aprobase este luns unha nova orde de continuidade para a xestión do aparcadoiro de Praza de Vigo, unha decisión que, segundo denunciou, prolonga unha situación de “precariedade contractual” que podería estar resolta se o goberno actuase a tempo.

Abal lembrou que a comisión de estudo deu o visto e prace á municipalización da xestión dos dous aparcadoiros o pasado 19 de xuño e que a previsión inicial era elevar o expediente ao Pleno ordinario de xullo. Porén, sinalou que, máis de tres meses despois da data prevista, o grupo socialista segue sen ter noticias dos avances na tramitación.

Para a concelleira, a aprobación dunha nova orde de continuidade pon de manifesto os atrasos do executivo nun proceso que xa conta cun pronunciamento favorable da comisión de estudo. Neste sentido, afirmou que a situación podería estar resolta “se o goberno de Goretti Sanmartín fixese os deberes a tempo”.

A representante socialista advertiu tamén das consecuencias desta demora para o servizo. Segundo expuxo, o atraso na municipalización está a pospoñer a posibilidade de mellorar as infraestruturas e ofrecer tarifas competitivas, así como de estudar o papel que poden desempeñar ambos os aparcadoiros no apoio ao comercio local e á mobilidade da veciñanza residente.

Abal considera que estas instalacións ofrecen oportunidades para avanzar cara a un novo modelo de xestión e mellorar un servizo relevante para Santiago. Por iso, cuestionou que o proceso continúe pendente sen que se coñezan novos pasos nin unha data concreta para o seu debate plenario.

Ante esta situación, o Grupo Municipal Socialista reclama ao goberno local que informe dos avances realizados desde o pronunciamento da comisión de estudo e que concrete cando ten previsto levar ao Pleno a municipalización dos dous aparcadoiros.

“Canto máis vai ter que agardar Santiago para que este cambio se faga realidade?”, preguntou Abal, quen insistiu na necesidade de que o executivo deixe de acumular atrasos e ofreza respostas sobre o futuro da xestión destas instalacións.