Val do Dubra mellora e humaniza o entorno da Pedra do Home, en Portomouro

A actuación abrangue 1.400 m2 e forma parte do compromiso do Goberno municipal coa recuperación e posta en valor dos núcleos do concello.

Val do Dubra, 20 de outubro 2026.- O Concello de Val do Dubra continúa avanzando na mellora dos espazos públicos e na recuperación dos seus núcleos de poboación a través de actuacións
destinadas a facelos máis funcionais, coidados e humanizados.

Neste marco, a intervención nos interiores de Pedra do Home, na parroquia de Portomouro, supón unha importante mellora da contorna, cunha superficie de actuación de aproximadamente 1.400 metros cadrados.

Os traballos contemplan a execución dun pavimento de formigón, acompañado de franxas laterais de adoquín de granito, combinando resistencia, funcionalidade e integración na contorna.

Ademais, baixo o pavimento canalizaranse as augas pluviais, coa instalación de sete pozos de rexistro e oito arquetas para acometidas, mellorando as infraestruturas deste espazo.

A obra, denominada Acceso Pedra do Home, está incluída no POS+ Adicional 2 de 2024 e conta cun investimento de 109.420 euros. A empresa adxudicataria é Obras y Viales de Galicia, S.L.

Esta actuación enmárcase na aposta do Goberno municipal pola recuperación e posta en valor dos núcleos de Val do Dubra, ampliando e mellorando os espazos comúns para facelos máis agradables, funcionais e pensados para as persoas.

Con intervencións coma esta, o Concello reafirma o seu compromiso cun modelo de municipio que coida os seus núcleos, mellora as infraestruturas locais e favorece a convivencia veciñal, contribuíndo a conservar e dinamizar os espazos que forman parte da identidade de Val do Dubra.