Pablo Vidal candidato á alcaldía de Ordes polo BNG

• O acto de presentación da candidatura terá lugar o xoves 22 de outubro no auditorio da Casa da Cultura de Ordes e contará coa presenza da portavoz nacional do BNG, Ana Pontón.

Ordes, 16 de outubro de 2026 – O portavoz do grupo municipal do BNG de Ordes, Pablo Vidal, encabezará por terceira vez a candidatura do BNG ás eleccións municipais, co obxectivo de seguir incrementando apoios da veciñanza para acadar a alcaldía nos comicios do 23 de maio de 2027.

O candidato agradece o apoio e a confianza da militancia do BNG e manifesta que “logo de 14 anos de experiencia como concelleiro da corporación municipal, chegará ás eleccións completamente preparado para asumir o reto de gobernar un concello que leva moito tempo demandando un cambio”.

Vidal remarca que “o PP leva 12 anos gobernando Ordes e manexando uns 131 millóns de euros en presupostos municipais, tempo mais que de sobra para facer todo aquilo que agora novamente promete”. Ademais, considera que o resultado “é unha vila carente de vida e un rural completamente esquecido e desatendido”, situación da que asegura “só se pode saír cun novo goberno ilusionado, que traia frescura, ganas de traballar e que saiba escoitar con humildade e atender as problemáticas que lle traslada a veciñanza”.

O candidato nacionalista tamén explica que o BNG “conta cun proxecto serio, ambicioso e transformador, coas ideas claras do que Ordes precisa para saír da deriva na que se atopa sumido e para volver a ser o motor e a referencia da comarca”. Vidal aspira a “conseguir a confianza daquelas persoas que, independentemente do que votasen noutros procesos electorais, soñen cun Ordes vivo, grande, con servizos de calidade e integrador”.

O acto de presentación de Pablo Vidal como candidato do BNG á alcaldía de Ordes terá lugar o vindeiro xoves 22 de outubro ás 20:15 horas, no auditorio da Casa da Cultura da localidade, e contará coa participación da portavoz nacional do BNG, Ana Pontón. Desde a agrupación nacionalista convidan a toda a veciñanza a que os acompañen neste encontro.