Rianxo aforrará máis de 100.000 € anuais no subministro eléctrico

O Concello de Rianxo aforrará máis de 100.000 euros anuais no custo do subministro eléctrico das instalacións municipais tras adxudicar o novo contrato á empresa Iberdrola Clientes S.A.U. A contratación realizouse a través do Acordo Marco da Central de Contratación da Federación Española de Municipios e Provincias (FEMP), un sistema que permite ás entidades locais acceder a condicións máis competitivas e simplificar os procedementos administrativos.

O contrato terá unha duración inicial dun ano e un importe de algo menos de 450.000 euros, IVE incluído. Esta contía supón unha importante redución do gasto respecto ao rexistrado en 2025 e un aforro aínda maior se se compara cos datos de 2023, cando o Concello destinou preto de 790.000 euros ao subministro eléctrico.

Desde o Goberno local destacan que este descenso no gasto non só responde á regularización do contrato de subministración, senón tamén ás actuacións de mellora e renovación das instalacións municipais desenvolvidas nos últimos anos para reducir o consumo enerxético.

O contrato formalízase a prezo fixo e cunha vixencia dun ano, o que garante a estabilidade do custo do subministro durante todo o período, sen posibilidade de revisión nin prórroga, conforme ao establecido nos pregos do acordo marco da FEMP.

O concelleiro de Obras e Servizos, José Alberto Angueira, sinalou que a licitación do subministro eléctrico municipal é un proceso complexo que require meses de tramitación. Tras analizar as condicións ofrecidas polas empresas do sector e o concurso nacional impulsado pola FEMP, o Concello optou por adherirse ao acordo marco, que permite acceder a prezos máis competitivos, simplificar a contratación e garantir a transparencia nos procedementos administrativos.

Para esta licitación convidouse ás empresas adxudicatarias do acordo marco, establecendo como único criterio de adxudicación o prezo, calculado en función dos consumos anuais estimados.

Con este novo contrato, o Concello de Rianxo reforza a súa aposta por unha xestión eficiente e responsable dos recursos públicos. Segundo destacou Angueira, o aforro acadado permitirá destinar os recursos que ata o de agora se empregaban no subministro eléctrico a reforzar outros servizos públicos e atender novas necesidades do municipio.