Santiago reunirá 900 ximnastas no Xacobeo de Ximnasia Rítmica os días 24 e 25 de outubro

O Multiusos Fontes do Sar acollerá o V Torneo Internacional Viravolta-Jael e a VI Gala Internacional, coa participación de 70 clubs de España e Portug

A campioa olímpica Darja Varfolomeev e o conxunto sénior da Selección Española encabezan unha gala solidaria cuxa recadación íntegra se destinará á Fundación Andrea

Santiago de Compostela, 21 de outubro de 2026. Santiago converterase esta fin de semana nun punto de encontro da ximnasia rítmica internacional. Arredor de 900 deportistas de 70 clubs participarán os días 24 e 25 de outubro no Xacobeo de Ximnasia Rítmica, que reúne o V Torneo Internacional Viravolta-Jael e a VI Gala Internacional no Multiusos Fontes do Sar.

A cita, organizada polo Club Viravolta Santiago, presentouse esta mañá no Real Aeroclub de Santiago coa participación do comisario do Plan Xacobeo, Marcos Gómez Román; a concelleira de Deportes, Pilar Lueiro; o presidente da Federación Galega de Ximnasia Rítmica, José Manuel Estévez; o director de Jael Joyería, José María Fernández; e a presidenta do club anfitrión e directora do torneo, Wendy Rey.

A olímpica española Carolina Rodríguez volverá exercer de madriña dun evento que combina competición, exhibicións de primeiro nivel e solidariedade. As entradas teñen un prezo de 12 euros, con acceso gratuíto para os menores de cinco anos, e o 100 % da recadación destinarase á Fundación Andrea. A propia entidade beneficiaria encargarase directamente da súa xestión.

A Xunta de Galicia, a través do Xacobeo, o Concello de Santiago, Longines, Celta Cargo e Jael Joyería son os patrocinadores principais da cita, que conta tamén coa colaboración dunha quincena de empresas.

Competición e figuras internacionais

O torneo desenvolverase nas mañás do sábado e do domingo, a partir das 8.30 horas. Participarán arredor de 900 ximnastas de 70 clubs: unha trintena de Galicia e o resto de Madrid, Castela e León, Castela-A Mancha, Canarias, Asturias, Estremadura, Baleares e Portugal, con cinco clubs lusos.

Un dos momentos centrais da fin de semana será a VI Gala Internacional Viravolta-Jael, que comezará o sábado ás 17.30 horas. Presentada por Carolina Rodríguez e polo xornalista de Radio Líder Álvaro Veiga, reunirá algunhas das grandes figuras da modalidade, entre elas a alemá Darja Varfolomeev, campioa olímpica en París 2024; a romanesa Uliana Ianus; a italiana Tara Dragas; e a turca Hatice Gökçe Emir.

A Selección Española estará representada polo seu conxunto sénior, campión do mundo, integrado por Salma Solaun, Inés Bergua, Andrea Corral, Lucía Muñoz, Andrea Fernández e Marina Cortelles. Tamén participarán as individuais Daniela Picó, Alba Bautista e Lucía González, así como as júnior Naira Martínez e Gisela Negre.

Protagonismo galego e espazo para a ximnasia adaptada

A gala contará cunha destacada presenza galega. Hernán Sío, do Club Ximnasia Porriño, dirixirá unha coreografía de ximnasia rítmica masculina na que intervirán Daniel Rey, do Club Viravolta e campión de España este ano; Roi Bouzas, do Club Biqueira; Unai Sánchez, do Club Maniotas; e Álvaro Blanco, do Club Agarimo.

Actuarán tamén Candela Martínez Bobo, do Club María Barbeito, e o conxunto de primeira categoría do Club Ximnasia Porriño. O club anfitrión presentará a coreografía «Una voz», creada pola bailarina profesional Clara del Valle, e volverán participar as ximnastas do Club Ritmo de León Flavia García, Sara Llana, Marta Pérez e Lola Ferro.

A ximnasia rítmica adaptada terá igualmente o seu espazo, coas actuacións do conxunto júnior de adaptada do Club María Barbeito e de Asier Garmendia, deportista da mesma entidade.

Wendy Rey destacou que o incremento da demanda de inscricións confirma o atractivo do torneo e vinculou este interese ao gran momento que vive a ximnasia rítmica española. A presidenta do Viravolta lembrou os éxitos do conxunto sénior da Selección Española, campión do mundo e tres veces campión de Europa, e explicou que a coreografía masculina pretende reivindicar «que a rítmica non ten xénero», nun contexto no que a modalidade masculina continúa sen presenza nos Xogos Olímpicos.

Rey salientou tamén a importancia de dar visibilidade á ximnasia adaptada e avanzou unha gala que combinará deporte, música, imaxes e emoción.

Un proxecto consolidado co apoio de patrocinadores e voluntariado

O director de Jael Joyería, José María Fernández, lembrou que a iniciativa naceu hai seis anos do empeño dun grupo de pais e nais e que hoxe se consolidou como unha referencia no ámbito estatal. Segundo explicou, o recoñecemento acadado facilita tamén a participación de figuras internacionais.

Fernández agradeceu o respaldo dos patrocinadores e das empresas colaboradoras e incidiu no carácter solidario do evento: a totalidade dos ingresos das entradas irá á Fundación Andrea, que asumirá directamente o seu cobramento.

Pola súa banda, o presidente da Federación Galega de Ximnasia Rítmica, José Manuel Estévez, destacou que o torneo contribúe a completar a actividade competitiva do segundo semestre e recoñeceu o papel esencial do voluntariado, ao que definiu como «a pedra angular» da organización.

Estévez puxo en valor o esforzo do club, das empresas e das administracións para manter unha cita destas características e animou o público a asistir a unha fin de semana que permitirá gozar tanto da ximnasia de base como da elite internacional, ao tempo que se colabora cunha causa benéfica.

Deporte, solidariedade e proxección de Santiago

A concelleira de Deportes, Pilar Lueiro, subliñou que a celebración do evento reforza a posición de Santiago como referente internacional da ximnasia rítmica e amosa o potencial do tecido deportivo compostelán. Felicitou a organización polo seu traballo e polo compromiso solidario da cita, e convidou a cidadanía a acudir ao Multiusos Fontes do Sar para gozar dun espectáculo de gran nivel.

O comisario do Plan Xacobeo, Marcos Gómez Román, destacou a consolidación da iniciativa e a súa contribución á dinamización do territorio, á proxección de Galicia e ao achegamento do deporte á cidadanía.

Gómez Román valorou especialmente a colaboración coa Fundación Andrea e a celebración do evento en outubro, polo seu papel na desestacionalización da actividade. Neste sentido, reafirmou o compromiso do Xacobeo co apoio a propostas que manteñan unha programación atractiva ao longo de todo o ano.